Ayera nochi e prome grupo di studiantenan, conoci manera bursalen, a sali rumbo pa Hulanda pa continua cu nan estudio. Un total di 207 hoben studiante a subi avion pa bay Hulanda, pero di e cifra aki no tur ta bay cu e vuelo di bursalen.

Manera ya caba ta conoci, e evento di despedida di tur aña organisa pa Departamento di Enseñansa, a bira cai manera un tradicion na unda famia-, amistad- y conocirnan ta bisa e hobennan ayo. Ayera no tabata excepcion.

Den un ambiente di felicidad, pero un poco di nostalgia, e studiantenan tabata dispidi di nan sernan keri y tabata pasa door di e portanan di Aeropuerto Internacional Reina Beatrix pa asina cuminsa un etapa nobo di nan bida.

Reportera di Bon Dia Aruba tabata presente na e evento di despedida y logra combersa cu algun studiante.

Un di e studiantenan aki tabata Shaduirre Maduro di 27 aña di edad, ken a conta Bon Dia Aruba cu e ta bayendo Tillburg pa studia Cybsersecurity (Seguridad Cybernetico). Shaduirre a splica cu el a scoge pa bay den e direccion aki pasobra e ta sinti cu “eynan mundo ta bayendo, mi a scoge algo cu mi ta wak cu den futuro mi por yuda Aruba back tambe y cu mi lo tin trabou garantisa tambe.”

Studiantenan di 27 aña cu ta bay Hulanda cu bursalen no ta hopi comun, Shaduirre a conta cu diferente motibo, entre otro salud, a pone cu el retrasa su biahe pa Hulanda. “Mi no tabata kier a bay ainda, pero despues toch mi a dicidi di tuma e chance,” el a bisa.

Angelica Joaquin ta otro hoben studiante cu lo ta continuando su estudio na Hulanda. Angelica a conta Bon Dia Aruba cu e ta bayendo Nijmegen y su estudio ta bira verpleegkundige.

Angelica a gradua den e richting di verpleegkundige na EPI y semper su deseo tabata pa drenta medicina y su meta ta pa bira un nurse practitioner.

Apart di e grupo grandi di studiante cu ta bay Hulanda, tin tambe e hobennan cu ta scoge pa bay studia den region of na Merca. E cantidad di studiantenan cu ta cay den e gruponan aki ta hopi mas chikito y mayoria di biaha e studiantenan ta simplemente biaha riba nan mes.

Den total 247 hoben ta bay continua nan estudio di exterio cu fiansa di Gobierno di Aruba, Arubalening.

Awe nochi e siguiente grupo di bursalen ta subi avion pa Hulanda.