Cu un inversion di mas cu 7 miyon florin gobierno di Aruba a dicidi pa renoba Bestuurskantoor, un monumento cu ta para desde 1942, tempo di Di Dos Guera Mundial.
Minister di Infrastructura Otmar Oduber (POR) a declara den conferencia di prensa cu e decision pa renoba Bestuurskantoor tabata uno cu a bin cu expectativa di e trabou grandi cu lo bin, maske e trabou berdadero tabata hopi mas pisa di loke a anticipa. “Dicon Bestuurskantoor?”, Oduber a puntra, contestando esaki bisando cu ta trata di e herencia di pais Aruba, pa loke ta su historia. E prome fase ta cla, cual ta inclui seccionnan A, B y C di e edificio. Proximamente lo bay renoba seccion D, cual ta premira di keda cla pa december venidero.
Yvonne Webb Kock, cabes di Monumentenbureau, kende recien a cumpli 30 aña di servicio den gobierno, durante un conferencia di prensa ayera atardi a splica cu cierto detayenan di e edificio ta tipifica e era den cual a construi esaki. Asina por ehempel segun Webb Kock, por ripara cu tin shingles riba e dak, mientras cu otro edificio tin panchi.
Webb Kock a indica cu pa e proyecto aki a bay busca potret bieu di e edificio pa asina restaura e monumento aki di un manera mas fiel posibel na con e tabata para tempo cu a lant’e. Asina a tuma e decision por ehempel di habri e balconnan bek, mescos e tabata antes.
Pa loke ta desaroyo di e democracia jong cu ta bibo na Aruba, Webb Kock a indica cu Bestuurskantoor ta forma hunto cu Corte di Husticia e unico dos edificionan cu tin mas cu 50 aña den existencia den historia di e estado di derecho isleño. “Esaki ta mustra e balor, pakico e edificio aki ta asina importante”, Webb Kock a clausura.
