Recientemente, Metabolic Foundation a completa e prome fase di un sondeo pa explora opcionnan accesibel pa carbon trading na Aruba. Den un paso notabel pa un modelo economico sostenibel y inclusivo, Minister Geoffrey Wever a laga investiga e beneficionan potencial di “carbon trading”, un iniciativa clave den e Plan di Accion 2023-2025: Aruba su transicion pa un modelo economico sostenibel y inclusivo. E enfoke innovador aki ta dirigi pa analisa e oportunidadnan y bentaha di compra y benta di carbon credits na Aruba.
E sondeo tabata tin como meta pa determina cuanto CO2 credits (1 credit = 1 ton CO2) Aruba por produci (via diferente projectonan) y kico su balor por ta, tanto actualmente como den futuro pa asina por midi e factibilidad pa cumpra/bende esakinan cu individualnan y/of organisacionnan internacional.
Carbon trading ta basa riba e concepto cu individuonan of companianan responsabel pa polucion di CO2 por cumpra “carbon credits” di entidadnan cu ta contribui activamente na medio ambiente. E contribucion aki por ehempel ta pa medio di desaroya proyecto di panelnan solar, apoya reservanan natural, of otro iniciativanan sostenibel cu ta sea reduci of elimina e emision di CO2.
Basa riba e resultadonan prometedor di e sondeo, a dicidi di pasa pa e siguiente fase. E fase aki tin como meta crea un projecto piloto unda lo test e compra y benta di carbon credits den e mercado internacional. Lo hasi esaki por medio di explora diferente plataforma di carbon trading existente rond di mundo cu por wordo implementa na Aruba. E siguiente fase aki lo conta cu e experticio di Metabolic Foundation y otro partnernan cu tin e conocemento necesario pa logra e metanan di e proyecto aki.
A largo plaso por uza carbon trading como un herment cu no solamente ta crea un modelo economico nobo, pero tambe ta contribui na un desaroyo mas sostenibel.
“E movimento di Aruba pa carbon trading no ta solamente un strategia economico; e ta representa un compromiso pa un futuro mas sostenibel y responsabel, aliniando crecemento economico cu cuido ambiental”, minister Geoffrey Wever ta termina.
