Prome fase di reforma fiscal lo tin su impacto riba inflacion

ATIA ta na fabor pa por move for di belasting directo pa indirecto

Aña 2019 a caba di habri, y hunto cune a drenta na vigor un pakete di cambio den e leynan di BBO/BAVP y BAZV di e prome fase di e reforma fiscal, cu a keda aproba recientemente.

ATIA tin cu wak e tipo di proceso ora di introduccion di un tipo di medida di e magnitud aki. Nan ta vocifera nan preocupacion continuo cu gasto di operacion di negoshi tin; pero di otro banda tin un inflacion cu ya caba na 2018 a wordo calcula alrededor di un 5%.

E prome fase di e reforma fiscal ta inclui cambio den e tarifa di inkomstenbelasting y loonbelasting. Pero tambe un fase transitorio di seis luna, pa e sector comercial cuminsa ahusta nan prijs di nan producto of servicio, ya cu ta prohibi pa menciona e suma di BBO, BAVP y BAZV riba e factura of recibo cu e ta duna su cliente na momento di efectua un benta. Segun informacion di departamento di Impuesto, un comerciante – a pesar cu e tin e deber di paga BBO, BAVP y BAZV na departamento di Impuesto – no ta obliga pa ley pa cobra su clientenan e impuestonan aki. E por absorba e gastonan aki, mirando cu nos ta papia di un sistema di ‘omzetbelasting’ y no un ‘sales tax’.

ATIA semper tabata na fabor pa por move for di belasting directo, pa belasting indirecto. Ya cu nan ta kere cu e peso pa comercio ta mucho halto. E peso pa cierto ciudadanonan ta mucho halto tambe. Mester reparti esaki miho, y belasting indirecto ta haci esaki. Pero si nan ta visualisa cu esaki lo tin su impacto riba inflacion.

Segun Ronald van Trigt, presidente di ATIA, introduccion por ehempel di BAVP, pero tambe cambio di BBO, y aumento di BAZV, a causa un inflacion basta fuerte na Augustus. E gremio aki den nan dialogo y contacto continuo cu gobierno a yega di trece algun punto di atencion.  E reforma fiscal aki ta uno bastante extensivo, y basta cos lo bay cambia, ya cu e tin di haber cu diferente fase cu ta bay tuma no solamente 2019, pero tambe cu nan lo wordo  introduccion na  2020.

Den e prome fase cu a drenta na vigor caba, pa un gran cantidad di hende e loonbelasting ta bay bira menos. E echo cu 7 mil hende mas no ta bay paga loonbelasting, ta duna bek e poder di compra na e hendenan comun y coriente, cual ta hopi importante pa economia. Pero ATIA kier  mira e prome movecionnan di e belastingnan directo pa belastingnan indirecto. Ta wordo premira cu e cambio di BBO/BAVP y BAZV lo a bay causa un inflacion tambe.

Van Trigt a splica cu nan ta den combersacion cu gobierno, unda cu nan ta implementa un ley caminda cu BBO ta bay wordo inclui den prijs. Ainda nan no ta na altura completamente riba detaya kico e ta bay ta, pero tin di compronde cu lo bay ta un reforma fiscal, unda cu ta bay kita e BBO, BAZV, tur e otro impuestonan, y bin cu un solo belasting, cu ta bay wordo destina pa esey.

Den pasado y te awor aki, tin belastingnan indirecto, pero mara na e mesun regimen di belasting bieu tambe. Esaki a haci cu e peso a bira hopi. Pero ATIA tin speransa si cu na cierto momento e reforma aki lo duna su beneficionan. Pero si e belastingnan indirecto lo bay wordo kita, y  belasting directo ta bay baha;  y e mester wordo substitui pa un belasting indirecto.

Sinembargo, como negoshi pa carga mas impuesto ta bira dificil. E reforma fiscal cu ta tumando luga, y cu ta  inclui cuater fase di cual e prome a caba di drenta na vigor, ta haci cu como gremio comercial y fuente di trabou, nan mester mira un prospecto riba e cambio aki. Nan tin comprension cu e no ta un cambio cu ta sosode di un dia pa otro.

Di dos fase di e reforma fiscal tin di haber cu aumento di accijns. ATIA no a wak e detayenan di e ley pa aumento di accijns y  kico lo bay pasa, ya cu ainda e ta un fase cu ta den preparacion. Te awor, loke ta wordo papia riba dje ta cu productonan manera sigaria y alcohol, lo cambia e sistema di cobr’e. E detaye di dje no a mir’e ainda; y nan ta na espera di esaki.

Realmente nan ta mira cierto cambionan cu lo bay tuma luga na 2019, pero e cambionan principal lo bay tuma un tiki mas tempo. Ta wak cu e cambio fiscal mes lo bay tuma luga evidentemente na 2020.