Minister di Turismo, Dangui Oduber a anuncia algun proyecto cu lo ta na caminda. Ademas di e proyecto di embeyecemento di Baby Beach cu a conoce su grounbreaking dialuna ultimo.
Un proyecto cu Oduber a yega di anuncia tin di haci cu e tereno di ex Bushiri Hotel, unda recientemente a tuma luga e competencia internacional di beach tennis.
Recientemente e prome fase di e proyecto di embeyecemento di Bushiri Beach -manera e mandatario a yam’e- a tuma luga, cu intencion cu e por bira un beach publico pa nos comunidad. Santo blanco a wordo poni riba e tereno aki, unda e evento di beach tennis a muda di Eagle pa Bushiri.
E mandatario a anuncia cu ta pendiente pa cuminsa otro aña cu e fase dos di Bushiri Beach pa sigui embeyece e area aki cu mas landscaping y facilidad, entre nan, restaurant y kiosco riba un nivel halto.
E meta di e proyecto aki ta pa e beach complementa e desaroyo di Port City. Segun e mandatario e mega-proyecto aki ta programa pa cuminsa otro aña ‘si tur cos bay bon,’ el a bisa. E mandatario no a bisa ainda un fecha specifico cu e proyecto aki lo conoce su grounbreaking tambe.
E ‘boardwalk Malmok’ ta otro proyecto cu su prome fase ta biniendo cla pa fin di luna aki. E mandatario a anuncia cu di biaha nan lo continua cu e di dos fase di e proyecto aki, pa asina percura pa tin un area sigur pa nos hendenan y turistanan por haci uzo di dje.
E ta un proyecto financia cu e fondo di Tourism Product Enhancement Fonds. E destaho pa e fase dos di ‘boardwalk Malmok’ ta tumando luga aworaki, el a bisa.
