Awe gobierno lo haci inauguracion di un di e etapa di LeerOrkest of siñamento pa orkesta musical. E ta un proyecto caminda e hendenan di menos recurso, no solamente mucha sino adulto tambe, lo por siña toca un instrumento.
Minister di Husticia, Andin Bikker a splica cu un tipo di siñamento di un instrumento musical lo cay hopi pisa pa un mayor di poco recurso, principalmente si e tin varios yiu. Di otro banda, e compra di e instrumento musical mes tambe ta bira un obstaculo ariba su mes. Aunke e ta mustra un proyecto cu eventualmente ta resorta bou otro ministerio, ya sea cultura y/of enseñansa, den e caso aki ministerio di Husticia ta aden tambe.
Ta resulta cu Bikker a wordo ilustra riba e proyecto aki durante e bishita cu su colega di Hulanda a realisa na Aruba recientemente. E ta un proyecto cu a contribui y cu ta traha perfectamente pa baha e indice di criminalidad na Hulanda y na Corsou tambe. Mirando e resultado aki, Bikker a dicidi di bin cu un tipo di pre- acuerdo (letter of intent), caminda hunto cu su colega di enseñansa, Rudy Lampe, nan a firme recientemente. Un par di luna so a pasa y ya caba nan lo cuminsa cu e prome fase, asina e mandatario a duna di conoce ayera.
E ta un proyecto cu tin diferente etapa cu ta brinda e muchanan y adultonan acceso pa nan por siña toca un instrumento gratis. Tambe e instrumento musical ta wordo poni na disponibilidad di nan gratis tambe.
