Recientemente tabata tin un reunion entre e tres minister presidentnan, Eugene Rhuggenaath di Corsou, Leona Marlin- Romeo di Sint Maarten y nos minister president Evelyn Wever-Croes (MEP). E reunion a tuma luga na Corsou.
Esaki ta e prome encuentro tripartiet entre e tres prome ministernan, segun e comunicado di gobierno. Den e reunion a toca varios tema di interes comun entre e paisnan. Entre otro a toca e retonan cu Sint Maarten ta enfrenta despues di horcan Irma.
Tambe a delibera riba e retonan financiero di e paisnan. Un tema cu a haya hopi atencion ta integridad. E paisnan a intercambia di ideanan y iniciativanan den e 3 paisnan.
“Nos reunion a bay den bon ambiente. Tabata pa prome biaha cu nos tres a reuni y nos a palabra pa haci esaki mas frecuentemente, pa asina por traha mas hunto riba diferente tereno. Mi ta satisfecho di e palabracionnan haci”, prome minister Wever-Croes a finalisa bisando den e comunicado.
