Den e dianan aki, mundo henter a sinti speransa cu e noticia cu vacuna contra Covid-19 di e compania farmaceutico Pfizer a mustra di ta 90 porciento efectivo. Maske ainda ta keda hopi pregunta, entre otro con largo e vacuna ta keda efectivo, varios pais ya ta anticipando pa ricibi e prome dosis.
Den un relato recien riba portal noticiero Ret Karibense, reportero Sharina Henriquez a puntra prome minister, Evelyn Wever-Croes tocante e maneho di reparticion di vacuna pa Covid-19.
Dialuna, mundo henter a ricibi cu hopi speransa e noticia di Pfizer, den cual nan a bisa, segun New York Times a reporta, hunto cu su partner Aleman, BioNeTech, cu resultadonan preliminar a mustra cu nan vacuna ta mas cu 90 porciento efectivo. E noticia a genera un ola di pregunta pa loke ta trata distribucion di e vacuna, maske esaki ainda no ta completamente cla pa wordo distribui na poblacion.
“M’a compronde cu Hulanda ya a inscribi pa haya e vacuna aki. Como Aruba bo por bisa nos ta lift mee”, prome minister di Aruba, Evelyn Wever-Croes a bisa Henriquez, agregando cu e prome dosis di vacuna cu a reserva lo mester yega na 10 porciento di e poblacion; Aruba no lo ricibi mas. “E prome ronda di vacuna nan lo reparti a base di e porcentahe di gruponan vulnerabel. Pregunta ta keda: con nos lo reparti e di dos ronda di vacuna bao nos poblacion. Esaki nos no sa ainda”, el a indica.
Ademas, manera Ret Karibense a reporta, despues di e segundo ola di infeccion cu a cuminsa na augustus ultimo na Aruba, nos tin e cantidad mas halto di casonan di morto (40) den e region di Hulanda Caribense, notando tambe cu e tasa di infeccion na dado momento tabata den top di mundo. Sinembargo, den ultimo simannan a nota un reduccion, pero prome minister ta conseha pa mantene cautela: “Nos no ta safe ainda y mester keda cauteloso.”
Potret: New York Times.
