Ayera Aruba a yama bon bini na Rey Willem Alexander, Reina Maxima y e princesa heredero, Prinses Amalia. Despues di un mainta cu actonan protocolario, encuentro cu gobernador di Aruba, parlamentario- y ministernan, e famia real a yega San Nicolas y nan a termina nan bishita dilanti Nicolaas Store na a unda nan disfruta di un bunita presentacion di arte di palabra y baile.

Durante nan bishita na San Nicolas, e famia real a pasa Filomena College y Filomena Collega Mavo na unda nan a presencia un exposicion basa ariba nos heroe di segunda guera mundial, Boy Ecury. Despues di nan bishita na e scolnan nan a bishita algun di e muralnan di arte popular den centro di San Nicolas y por ultimo nan a disfruta di varios presentacion dilanti Nicolaas Store.

Durante presentacionnan di baile, diferente grupo di baile di Aruba a presenta pa e famia real un variedad di cancionnan. E show a cuminsa cu un presentacion di baile moderno den man di Popcorn Dancers, bao direccion di Freddy Tromp. Despues a sigui un presentacion di arte di palabra, un poesia di Kay Quandus, ken a dedica un poema na e princesa heredero, Prinses Amalia.

Despues di e presentacion di arte di palabra a toca turno pa tres grupo di baile di mucha di Aruba cu a presenta un bunita potpouri di cancionnan carnavalesco pa e famia real. E gruponan di baile Kids & Youth in Action, bao direccion di Debra Boekhoudt y Raisa Montilla, NTG Dancers, bao direccion di Marisol Peña y Dazzling Dancers, bao direccion di Jeanique de Palm, a deleita e famia real y publico presenta cu un bunita show di carnaval y a luci pañanan carnavalesco y asina por a duna e famia real un prueba chikito di kico carnaval di Aruba ta.

E parti di presentacion a termina cu un ‘flashmob’ sorpresa durante cual diferente hende a sali for di den publico y a subi e area di escenario pa a haci un baila coordina y asina clausura loke tabata e parti di presentacion di baile y arte pa e famia real.

Por a tuma nota den publico presencia di algun grupo y persona cu tabatin pancarta y tabat’ey presente pa expresa, a traves di un estilo di protesta silencioso, un mensahe na Rey Willem Alexander tocante temanan cu nan no ta di acuerdo cune y cu nan lo desea pa Rey Willem Alexander presta atencion na dje.

“E mensahe cu mi kier trece pa e Rey, ta cu den 1636 ora nan a colonisa nos, el a bay robes pasobra nan a yega coy nos tera. Aworaki ta 2023 y nos kier haci un encuentro di nobo. Nos ta riba nos tera, esaki tur ta di nos. Nos ta welcome e Rey, pero no como colonisador, pasobra e mester reconoce cu ta nos ta e habitante legitimo di Aruba y e luga ki di nos y tur cos cu nan a coy for di nos nan mester djis duna nos back,” Helena Croes di Arubian Warriors a declara na Bon Dia Aruba.

Anouk Balentina, ken ta conoci pa su lucha durante hopi tempo contra e dump na Parkietenbos y tur e contaminacion cu esaki ta causa na medio ambiente y sobretodo e efectonan cu esaki tin riba e salud di e habitantenan, tambe tabata presenta pa expresa su mensahe na Rey Willem Alexander.

“E Rey ora cu e ta huramenta como Rey, e ta bisa cu e ta para pa mantene e statuut, y statuut ta bisa cu na momento nos derecho fundamental no ta wordo respeta door di un gobierno nacional, nan mester garantisa nos e seguridad eynan,” Balentina a indica, referiendo na e lucha continuo contra e dump di Parkietenbos y con esaki den un forma ta viola e derechonan fundamental di bida y salud di esnan cu mester biba dia aden, dia afo cu e contaminacion di e dump.