Segun nos prome mandatario, Evelyn Wever-Croes, Aruba ta cumpli cu tur condicion. Asina organo di supervision financiero CAft a raporta na conseho di minister di Reino siman pasa. Esaki a haci cu nos por logra e fiansa di e di tres tranche cu ta cubri tres luna (juli-augustus-september) pa un fiansa di 204 miyon.

El a splica cu e suma aki no ta inclui 5 miyon pa luna di reduccion di AZV. Tambe Hulanda no a aproba un pot di inversion di 40 miyon florin pa haci mantencion necesario di varios ekipo y material di gobierno cu tin di haci entre otro cu infrastructura. Nan kier wak con e suma aki por sirbi mas bien den reactivacion di economia.

 

Sinembargo Hulanda a bin cu condicion nobo pa facilita e prestamo di 204 miyon florin diabierna awor pa gobierno por atende cu tur obligacion financiero cu pais Aruba tin. Den e suma aki tambe ta cay FASE y subsidio di salario. E aprobacion of no di e fiansa aki ta depende di e decision cu Aruba lo tuma prome cu diabierna cambio riba e regimen di supervision financiero di LAft (Landsverordening Aruba financieel toezicht) pa un RFT (Rijks Financieel Toezicht). P’esey e prome mandatario sin vacila a bisa: “Nos ta lomba contra muraya.”

Ya caba el mandatario a anuncia cu e tipo di decision aki mester sali for di un plataforma mas amplio, ya cu e gobierno no ta bay tum’e su so, ya cu e tin un embergadura nacional. Gobierno lo cuminsa cu un ronda di consulta. Nan lo tin un consulta grandi diaranson awor cu tur gremio y tambe cu parlamento.

Pero tambe unabes cu el a conoce e condicion nobo for di secretario di Estado y asunto di Reino, Raymond Knops diadomingo, el a cuminsa consulta caba cu diferente partnernan pa cuminsa fula nan opinion tocante e ultimo condicion aki. Gobierno ta evaluando kico ta e miho opcionnan. Tur e ronda di consulta aki lo tuma luga prome cu gobierno tuma un decision pa diabierna awor.

Premier Wever-Croes a declara na Bon Dia Aruba cu tin cierto preocupacion y reserva, specialmente kico ta bay pasa cu nos debenan existente. P’esey ayera e tabata wardando e momento cu for di Hulanda e documento cu e condicion nobo lo wordo manda. E ta haya cu den e momento cu pais Aruba ta actualmente mester ta prudente pa cualkier resistencia.

El a pidi pa tur hende pa no laga resistencia y emocion como prome cos. Sino pa nos cuminsa pensa racional kico ta miho pa Aruba. Unabes cu e condicion nobo aki ta bin riba papel nan por cuminsa analis’e bon y evalua si lo bin resistencia si of no.