Prome cu na luna di maart awor e plachi di number di auto 2020 wordo otorga, ya caba tin hendenan cu ta coriendo cu plachi falso rond di nos isla.
Tanto directora di departamento di Impuesto, Luenne Gomez-Pieters, como nan vocero, Meverlyn Romano a informa cu ya a descubri plachi blanco cu cora falso.
“Nos tin bista riba nan!”, Romano a bisa. Nan ta hayando informacion via diferente canal, y el a agrega cu nan tin ‘wowo y horea’ pa tur e caso aki. Ademas e departamento aki a bin cu un plachi cu tin mas elemento di siguridad den dje pa evita cu por falsifica.
Entre nan, e tipo di font uza internacionalmente pa preveni fraude. Ademas -segun Luenne Gomez-Pieters- tin otro cambionan den e plachi 2020 cu lo por verifica tambe si esaki ta legitimo of no.
Nan tin un departamento di inteligencia cu ta investiga e caso aki. Si ta necesario nan ta bati na bo porta cu polis y Ministerio Publico (OM) pa bo para responsabel di e acto fraudulento aki. El a bisa rotundamente cu nan no ta acepta falsificacion di plachi di number.
Denuncia.
E ta alerta nos ciudadanonan si nan mira un auto cu ta coriendo cu un plachi cu no ta original di esun cu ta wordo otorga pa departamento di Impuesto, ta falso. Kiermen e ta un fraude y e ta bay contra nos ley.
E ta conseha cu si bo ta perde bo plachi di number pa cualkier motibo, bo mester bin cerca nan pa manda traha bo plachi mesora, y haci e denuncia cerca polis den caso cu bo plachi a wordo horta. “E ta un cuestion di tuma accion mesora”, el a bisa.
E ta pidi cualkier ciudadano cu ta wak un auto cu tin un plachi di carton of di sticker of cualkier otro forma of number straño, saca su potret y mand’e pa departamento di Impuesto. Nan lo percura pa tuma contacto cu polis y cana e proceso pa bin cu un accion penal contra dje.
