Mientras cu tin un retraso cu pago pa loke ta e settlement agreement na balor di entre 56 pa 60 miyon florin cu a haci cu Valero, minister demisionario di finansas Angel Bermudez ta splica cu e tin tur confiansa cu e placa lo drenta.
E declaracion aki a wordo haci na e fuente noticiero NoticiaCla durante e programa di NoticiaCla LIVE. E mandatario lo a declara cu Aruba lo mester ricibi e pago aki den dos parti. Segun e mandatario ta splica na e fuente, cu e retraso di e pago aki lo tin di haber cu cosnan cu mester a keda formalisa, cual si tur cos ta bon, a keda cla siman pasa segun e declaracion haci. E placanan cu mester ricibi ta procedente di Fuels Marketing & Supply Aruba (FMSA) y tambe un suma en efectivo segun NoticiaCla.
Tambe e mandatario a splica cu na banda di esaki, loke falta pa drenta ta sumanan di impuesto cu ta pone riba presupuesto pero no a drenta ainda. Tin di nan cu mester a wordo paga caba mas trempan den aña pero a haya un uitstel cual ta duna un termino mas largo pa paga.
