Diaranson ultimo, Ronella Tjin Asjoe-Croes, CEO di Aruba Tourism Authority (ATA) a duna di conoce cu 83 negoshi cu ta cay den categoria di Retail a registra desde cu e programa Aruba Health & Happiness Code (HH Code) a wordo anunciadialuna ultimo y cu tambe a wordo desaroya den colaboracion estrecho cu DVG.
Tjin Asjoe-Croes tambe a expresa cu 129 restaurant de categoria di Food & Beverage a registra, di accommodation ta 105 y Food Truck ta 5. El a menciona cu te ainda registracion ta tumando luga y cu tur compania mester haci e registracion aki lo mas lihe posibel, prome cu 31 di mei.
Tjin Asjoe-Croes a informa cu a cuminsa cu un fase 1 di e sector na unda supermercadonan, tiendanan, Food Truck, restaurant, entre otro a registra. Den e fase 2 cu ta sigui, nan ta spera cu nan por continua esey otro siman cu lo tin e protocolnan vigente pa car rental, companianan operador di tour, esunnan cu ta ofrece actividadnan, spa y casino, un fase cu lo sigui manera e protocol ta disponibel pa e sector aki.
Tur esaki ta disponibel riba e website www.arubacovid19.org y mester click riba e icono Aruba Health & Hapiness Code (HH Code).
Di loke ta trata e persona/compania cu a acudi na e website na unda tin tur e informacion, Tjin Asjoe-Croes a expresa cu algun di nan ta registra pero nan no ta haya e protocol. Na momento di registra mester yena un lista di chekeo y esey ta e protocolnan cu nan ta papia di dje. El a bisa cu no mester tin confusion pa motibo cu mester yena e lista y bisa si ta cumpli cu e diferente puntonan, esey ta e protocol estableci pa e sectornan cu a wordo menciona caba.
Tambe el a enfatisa cu e sistema aki ta consisti di dos seyo. Un seyo di color cu e persona/compania ta haya na momento di completa e lista di chekeo of lista di protocolnan online. Esaki ta un seyo cu ta identifica cu e compania a completa e fase ey. E di dos parti di e programa ta na momento cu e lista cu e persona/compania a completa ta bay pa instancianan concerni cu ta DVG y DWH y na e momento ey lo haci un planificacion combina cu diferente responsabilidad pa planifica un bishita di inspeccion. Si e persona/compania ta cumpli cu tur cos debidamente y exitosamente, lo bay na remarca pa haya un seyo color oro.
Otro aspecto cu Tjin Asjoe-Croes a splica, no ta un rekisito pa e persona of compania mester completa e lista di chekeo pa e negoshi por habri. E apertura di e diferente negoshi ta cana den linea cu e comunicacion cu ta wordo brinda riba esaki. El a duna como ehempel cu restaurant por cuminsa habri dialuna 25 di mei cu cierto condicionnan, no ta necesario completa e chekeo; pero e lista ta obligatorio prome cu 31 di mei, esey ta un aspecto cu tin cu completa pa cumpli.
Unabes cu lo lansa e lista di chekeo y protocolnan pa otro sectornan, nan tambe lo anuncia kico ta e ‘deadline’ pa completa e fase pa por haya e seyo. E siguiente parti di e programa ta algo cu lo tuma mas tempo y cu colaboracion di autoridadnan concerni e persona/compania por spera e bishita di e inspeccion.
Tjin Asjoe-Croes a comenta cu ATA lo tuma contacto cu esunnan cu ta completa e lista di chekeo y tur cos debidamente pa e persona of compania por pasa busca e seyo, of tambe lo haya unabes cu tur e fase ta completa den e programa aki.
Ademas, el a sigura cu otro siman lo percura pa algun compania por haya nan prome seyo di color, mirando tur e registracion cu a drenta y ainda nan ta ricibi.
Bon Dia Aruba a puntra Tjin Asjoe-Croes durante, un conferencia di prensa, a base di cua ley e programa aki ta obligatorio, pa loke el a contesta cu esaki ta acapara den diferente legislacion como Ministeriele Regeling cu ta cubri tur locual ta trata calamidad cu ta atendiendo aworaki. Tambe el a enfatisa cu gran parti di e lista di e protocol ta protocol cu ya caba tabata existi prome cu COVID-19. E legislacion cu ta cubri e parti di DVH, por ehempel, inspeccion, ta aspectonan cu ta trata di higiena y ta forma parti di protocolnan standard.
