Cu hopi positivismo y orguyo Aruba Ports Authority N.V. (APA) ta informa cu e barco crucero Carnival Celebration a bishita nos isla pa prome biaha. Aruba Ports Authority N.V. a yama e barco crucero bonbini cu un water salute.

Di e forma aki a celebra su prome bishita den e awanan di Aruba, pa despues sigui un ceremonia abordo unda Marc Figaroa na nomber di APA conhuntamente cu ATA y e agencia pa Carnival na Aruba, a intercambia e plakkaat di custumber cu e capitan di e barco pa asina conmemora na prome bishita na nos isla.

Carnival Celebration ta e barco crucero di mas nobo den e flota di Carnival Cruise Lines. E barco crucero, Carnival Celebration, tin un largura di 344 meter y tin un capacidad pa 5374 pasahero abordo.

E “inaugural call” di Carnival Celebration na nos isla tabata dia 23 di mei, sinembargo el a cuminsa nabega desde november 2022. E itinerario di Carnival Celebration ta dura ocho dia den e parti zuid di Caribe. E itinerario a cuminsa na Miami y a dura dos dia riba lama. Despues a pasa Boneiro, Aruba djey Corsou pa despues sigui dos dia riba lama y termina cu su ruta na e mesun punto di salida, esta Miami.

Carnival ta un di e lineanan di crucero di mas importante pa Aruba y ta un linea di crucero cu ta opera durante henter aña, te hasta durante e temporadanan di “mas abou”. Ademas, Carnival Celebration ta e di dos barco di Excellence Class, cu ta e barconan crucero grandi y moderno di Carnival Cruise Lines.

Algo peculiar y interesante ta cu Carnival Celebration ta e prome barco crucero di LNG (Liquified Natural Gas) na Aruba. E tipo di barconan aki ta reduci emision di carbon den atmosfera. Den e industria di barco crucero ta haciendo masha hopi esfuerso pa reduci e emision di carbon den atmosfera cu ta causa cambio den clima rond mundo. Esaki den linea cu regulacionnan di decarbonisacion stipula pa International Maritime Organization (IMO).

“Nos ta contento di ricibi Carnival Celebration pa prome biaha awe. E barco crucero mas nobo di e flota di Carnival Cruise Lines y alabes e prome barco crucero na nos waf cu ta opera uzando un combusitibel mas limpi cu ta LNG. Esaki sigur ta un muestra di e confiansa cu Carnival Cruise Lines tin den Aruba”, asina Marc Figaroa, CEO di Aruba Ports Authority N.V., a duna di conoce.

Aruba ta keda un di e miho destinacionnan den region. E industria di crucero a reinicia su operacionnan na juni 2021 y ta premira cu e aña aki e por yega cerca di e nivelnan di 2019, asina lo logra un recuperacion di e pandemia den un periodo di 2 aña y mey, a pesar cu nos a drenta e “low season” pa Caribe desde e luna aki.

Tocante Aruba Ports Authority:

A funda Aruba Ports Authority N.V. na aña 1981. E compania ta pertenece 100% di Gobierno di Aruba y tin 80 trahado den servicio directo. Hunto ta maneha e dos wafnan di Aruba, pues tanto esun di crucero na Oranjestad como tambe esun di carga na Barcadera, unda nan tin un acuerdo di operacion cu ASTEC. Pa aña ta yega mas o menos 300 crucero na Oranjestad y un otro 905 barco di carga na Barcadera (sin conta barkitos y launch services), prome cu e pandemia. E compania ta stabiel y ta bou maneho di Marc Figaroa.