ORANJESTAD – Dialuna awor lo inicia e prome conferencia di e Dialogo Tripartite Social Laboral.
Esaki a demanda –segun minister di labor, Glenbert Croes– 8 luna di preparacion, unda un comision tecnico a traha pa dun’e un structura serio. E ta kere cu esaki ta loke a faya durante e dialogo social di gobierno anterior. P’esey nan a dicidi di prepara esaki bon, pero tambe bin cu reglanan pa garantisa su exito.
“Ta depende di nos mes con serio nos ta tuma e dialogo Tripartite social laboral pa refleha e seriedad di e productonan cu lo sali di e discusionnan y acuerdo,” segun e mandatario.
El a agrega cu ta nan deber di sirbi interes general di un forma serio. Nan kier atende e temanan cu un base amplio, pa despues gobierno y parlamento di Aruba trata loke mester wordo atendi den ley. Nan ta tema di interes colectivo riba area social, laboral, salud, economico, financiero, siguridad, husticia, infrastructura, etc.
E ta haya cu esaki lo test gobierno. Pasobra e acuerdonan cu nan por yega na dje den e dialogo aki, mester wordo implementa door di gobierno. Esaki no ta kita cu por surgi diferencia di opinion. Pero loke a wordo palabra caba ta, cu un comision tecnico di experto profesional (tambe Tripartite) ta atende cu un tema cu ta demanda mas estudio y preparacion. E comision di profesional aki lo por bin cu recomendacionnan pa asina den plenario por tin un decision final.
Segun Croes, e obhetivo di e dialogo aki no ta pa nan bay na mesa pa kibra for di otro. Sino cu nan obhetivo, of punto di salida, ta pa bay na mesa y asina nan por yega na otro. “Y ohala ora cu nos ta yega na otro, kiermen gobierno ta di acuerdo, gremio comercial ta na acuerdo y gremio sindical ta na acuerdo,” el bisa.
Dialogo Tripartite y parlamento
Igualmente, el a expresa cu niun momento nan no por papia pa parlamento. El a señala cu parlamento lo ta participe di e proceso aki. Nan ta spera cu e transparencia y seriedad di e asuntonan cu lo wordo discuti, y den entendimento comun riba asuntonan cu ta wordo dicidi, lo por haya apoyo tambe den parlamento di Aruba.
“Claro, ta keda e prerogativo di parlamento di Aruba, si nan tin un pensamento diferente,” el a bisa. E participacion di nos organo legislativo den e proceso aki lo ‘sigura cu e producto final cu nos ta yega na dje por haya aprobacion,’ e mandatario a declara.
Prome conferencia
E dialogo aki entre gobierno, gremio di dunado di trabou (KvK y ATIA), y gremio sindical (FTA y STA) lo cuminsa 9or di mainta na La Cabana Resort.
Segun e mandatario, esunnan cu ta presente ta esunnan cu a forma parti di e comision tecnico. Pero e dialogo aki no ta limita na e grupo aki so, sino cu tur sindicato ta invita, y e ta spera cu tur por participa tambe. E otro gremionan, manera prensa y organisacion di pensionado, tambe ta invita.
E mandatario a bisa cu e forma cu nan a scoge pa reuni cu otro, Organisacion Pensionado Publico Arubano (OPPA) tambe lo ta presente durante e reunionnan. E presencia aki di OPPA den e reunionnan di e dialogo aki lo ta hopi importante, segun e mandatario. Ya cu futuro di e pensionadonan ta importante. “Awe nos ta trahado, y mañan nos ta pensionado. Nos kier OPPA pa nan ta presente den e reunionnan y lo duna nan contribucionnan”, el a bisa.
E prome tema cu lo wordo atendi tin di haber cu e ley di ARBO. E ta un forma –segun e minister di labor– pa duna importancia na e fecha di 28 di april, considera como Dia Mundial di Siguridad y Salud na Trabou, segun Organisacion Internacional di Labor (ILO).
Nan a duna prioridad pa atende cu e ley di ARBO, ya cu e ta un ley cu ta na spera pa hopi tempo. Un ley cu ta un necesidad pa tin e condicionnan pa garantisa siguridad y salud pa tur trahado na pia di trabou. Segun e mandatario, nan ta kere cu esaki ta e caminda di entendimento y solucion cu nan mester cana.
