– E prome conferencia Caribense riba crimen cibernetico (Caribbean Cybercrime Conference) a atrae mas di 130 participante di varios compania y personanan cu kier a sa mas di e topico aki. E conferencia a tuma luga ayera na Renaissance Convention Center.
E ‘Caribbean Cybercrime Conference’ a wordo organisa pa oficina di Procurador Generalnan di Corsou, Sint Maarten y islanan BES, hunto cu Recherche Samenwerkingsteam (RST). Meta di e conferencia tabata na prome luga pa crea conscientisacion pa e problema creciente di crimen cibernetico y e necesidad pa haci mas investigacionnan digital. E meta tabata pa splica kico investigacion digital forensico y crimen cibernetico ta encera. E apertura di e conferencia tabata den man di director di e team forensico di DataExpert, Sr. André Hakkers, sigui pa un palabra di bon bini di hefe di RST, Martine Vis y varios orador mas den e ramo di crimen cibernetico. Entre nan representantenan di gobierno, husticia, cuerponan di polis di Aruba, Sint Maarten y Corsou, y tambe representantenan di companianan priva y gubernamental den Caribe.
Tambe a hiba palabra Minister di Husticia Sr. Arthur Dowers, cu den su discurso a bisa cu e conferencia tabata di suma importancia y cu Aruba tabata tin mester di dje. E motibo ta cu ultimamente e crimennan cibernetico a bira un topico hopi papia den comunidad y rond mundo tin varios persona cu a bira victima di esaki.
Dowers tambe a duna di conoce cu e mes a bira victima di un caso similar, unda cu su cuenta personal di banco a wordo gehacked. Di biaha minister a bay wak kico ta pasando, pero e banco mes no a haci nan mes responsabel pa loke a pasa, pa motibo cu nan a bisa cu nan no a hack banco sino e persona a wordo gehacked. Locual minister ta pidi pa pueblo haci ora bira victima di crimen cibernetico, aunke ta mustra straño, ta pa haci denuncia pa asina e instancianan concerni por tin un bista mas amplio di con frecuente crimen ta tuma luga.
A puntra minister Dowers si lo bay tin mas conferencia tocante e topico aki y el a contesta cu sigur cu si. Aunke esaki tabata e prome conferencia di Caribe, tabata tin caba cu a wordo teni den exterior.
Pregunta haci tambe tabata si Aruba tin su mesun departamento di atende cu crimen cibernetico. Dowers su contesta tabata cu actualmente no, pero ta den proceso pa construi e netwerk. Aruba swi tin un task force cu ta ocupa cu crimen cibernetico, pero e no ta cien porciento ainda. Sinembargo no falta mucho tampoco pa esaki keda cla, segun minister Dowers.
No tin un bista cu un cifra concreto di cu cuanto crimen cibernetico a subi, pero asumiendo cu tecnologia ta algo cu a avansa masha hopi mes y cu mas y mas hende ta haci uzo di esaki e posibilidad t’ey cu e cifra lo ta aumentando.
E orado principal tabata Lodewijk van Zwieten, cu su presentacion titula “Bedreigingen en uitdagingen op het gebied van cybercrime en cybersecurity”. A continua cu sesionnan tocante crimen cibernetico y investigacion digital forensico.
Clausura di e conferencia tabata den man di Michael Stout, consultant y entrenado riba tereno di siguridad di informacion, cu e discurso final titula “Demystifying the Dark Web”.
