Bufete di procurador general hunto cu e team di cooperacion di recherchenan di Reino (RST) y e organisacion Dataexpert for di Hulanda lo ta anfitrion di e prome conferencia di crimen cibernetico pa e regio Caribense, na Aruba.
E conferencia lo tuma luga 16 di november na Renaissance Hotel.
E meta di e conferencia ta pa conscientisa hende tocante e menasa creciente di crimen cibernetico rond mundo. E obhetivo ta pa splica den su totalidad kico crimen cibernetico ta.
Den e ultimo decada e uzo di aparatonan electronico manera Ipad, Smarthphones, laptop a subi exponecialmente. No solamente den e usuarionan social pero tambe entre e criminalnan. Pa motibo di asina hopi innovacion den e mundo cibernetico ta haci e investigacionnan mas compleho pa e asina yama Cyber Police.
Manera ta conoci cu aki na Aruba mes nos a haya varios caso similar cu a pasa cu companianan manera Elmar, WEB, Arubus, Hospital, Setar y asina tin mas. E crimen cybernetico tabata existi caba pero den e ultimo tempo el a cuminsa lanta cabes y ta yegando mas cerca den nos area. Pa es motibo aki mes ta na su luga bay bin cu un conferencia asina aki.
E oradornan lo ta Andre Hakker director di e team Forensico di DataExpert, sigui pa e hefe di RST Martine Vis y procurador general di Curaçao Sint Maarten y e islanan BES, Guus Schram. Tambe lo tin e presentacion yama ‘Threats and Challenges in the area of cybercrime and cyber security’ di Lodewijk van Zwieten cu ta senior fiscal; y tambe Michael Stout, senior consultant y trainer lo presenta ‘Demystifying the dark web’.
