Mita di e celnan container for di Bonaire, cual lo mester resolve – temporalmente – e falta di cel na Sint Maarten, a yega e isla. Esaki segun Tjandra Lake di Ministerio di Husticia di St. Maarten. Diesun container a ser transporta na St. Maarten cu ayudo di Ministerio di Defensa riba e barco di marina Zr. Ms. Pelikaan. Lo transferi e containernan na prizon Point Blanche e siman aki.
E falta di cel di prizon tabata e motibo pakico criminalnan (hoben) a keda deteni demasiado largo den cel den warda di polis, of tabata permiti pa warda nan huicio den libertad.
Abogado Shaira Bommel a confirma cu dos di su clientenan a pasa casi henter luna di augustus den cel na warda di polis y cu nan a wordo manda cas dia 28 di augustus. Un di e clientenan aki ta sospechoso den un caso di robo cu arma y posesion di arma.
22 cel container ta disponibel pa St. Maarten. E resto di e containernan lo wordo transporta pronto pa un compania di transporte, segun Lake. “Nos ta haya extremadamente importante cu e proyecto aki ta maneha apropiadamente pasobra nos lo kier trece nos sospechosonan, algun di kende ta deteni den exterior, bek na cas. Pa e motibo aki, fondo apropia a wordo aloca na e proyecto.”
Disminucion den capacidad di detencion
Prizon di Point Blanche tabatin capacidad pa 120 detenido, pero pa motibo di e daño causa na e edificio pa horcan Irma na 2017, esaki a baha na 80. Y despues di un veredicto di Corte Europeo di Derecho Humano, unicamente dos persona por ta deteni den cel na warda di polis, na luga di tres. Esey a baha e capacidad di detencion cu 1/3.
Nico Schoof, presidente di Voortgangscommissie Sint Maarten, tin su duda tocante e cel container: “E ta crea mas capacidad pero e containernan lo ta poni den centro di e patio. Esey lo laga menos espacio pa actividad recreacional.”
Voortgangscommissie Sint Maarten ta batiendo alarma pa nuebe aña. Dentro di dos siman, e comision lo publica su di 34 reporte. Den mayoria di e reportenan aki, Schoof y miembronan di su comision semper a vocifera nan preocupacion tocante e sistema di prizon riba e isla. Hasta si e comision ta un tiki positivo e aña aki.
“E comision ta positivo tocante e accionnan cu a ser tuma durante e ultimo lunanan y e mehoracionnan visibel, pero pa añanan tabatin casi ningun mehoracion haci. Dos aña atras hasta nos a sugeri na Parlamento pa nan disolve e comision, pasobra ni St. Maarten ni Hulanda ta haci nada”, Schoof a bisa.
E comision ta nota cu, cu e Minister di Husticia nobo, De Weever, y un Director nobo, nan ta ‘sikiera mirando algun plan’. E minister tin 23 empleado adicional den training (personal di siguridad y wardado). Pero ainda mester haci hopi. “Ainda mester haci hopi pa hiba Pointe Blanche unda e mester bay. E capacidad ta demasiado abou, reintegracion no ta na e nivel cu e mester ta, manera ta e caso cu servicio di libertad condicional y Voogdijraad”, e comision ta bisa den su reporte di mei e aña aki.
Criminalnan bek riba caya
Oficina di Fiscal tin su man yen cu e traslado di detenidonan den cel na Warda di Polis y na prizon Pointe Blanche. “Pa motibo di e cantidad di meter cuadra rekeri pa cada detenido, nos no por sigui detene tres persona den un cel, sino dos. Esey ta coincidi cu e terminonan cual a wordo set up pa asina nos por papia di detencion humano di persona”, segun Hefe di Fiscal, Mirjam Mol.“Mester haci un inversion grandi den cumplimento di ley na St. Maarten. Mester construi un prizon nobo. Ademas di capacidad di detencion, tin mester pa mas empleado den oficina di libertad condicional, y Voogdijraad. Nos mester un Oficina di Libertad Condicional Hubenil adecua, facilidad di cuido psikiatrico, tratamento pa adiccion y servicionnan pa sosten di victima.”
Mol tambe ta admiti: “Si no tin suficiente capacidad di detencion pa cera tur persona cu ta representa un menasa serio pa siguridad publico na St. Maarten, e personanan aki ta wordo libera bek riba caya.”
Schoof ta agrega: “Esaki ta un situacion inaceptabel y insigur dentro di Reino pa hopi aña.”
