Diabierna mainta hues a dicta sentencia di 15 aña di prizon incondicional y tratamento di TBS (Terbeschikkingstelling) pa e padrastro Gabriel Martin, di Rishandroh y Eugene.

Hues a duna sentencia di tratamento di TBS, un tratamento psikiatrico obligatorio sin un duracion defini pa e culpabel.

Hues a haya sr. Martin culpabel y confirma cu a base di e pruebanan legal presenta a base di maltrata y den un forma grave a caba cu e bida di e dos rumannan Rishandroh Anastacia (5) y Eugene Frans di (2). Tambe ta acusa sr. Martin pa maltrata e mama di dos muchanan y pa sconde e curpa di Eugene bou di un palo di kiwi na Savaneta.

Hues a mustra cu e sospechoso a coopera cu e proceso penal y a haci declaracionnan di culpabilidad. Tambe cu mester a considera cu den e caso aki mester a busca pa yega na un balansa riba e sufrimento cu e victimanan y famianan di ambos banda. Pa evita cu un caso asina ta ripiti, pa cual mester provee e siguridad pa e comunidad.

Segun hues, sr. Martin a wordo trata pa tanto un psikiatra como un psicologo. Ambos a yega na e conclusion cu e sospechoso ta sufri di trastorno di personalidad, cu caracteristico cla psicopatico. Sr. Martin tin chens cu e lo uza violencia contra personanan atrobe sin ricibi tratamento.

Debi na su estado mental, e no por wordo teni responsabel pa su actonan. “En caso e no haya e tratamento necesario, chens pa aumento di recidivismo lo aumenta”, hues a sigui bisa.

E derecho penal di Aruba ta permiti esey segun hues. Pa laga e sospechoso bolbe den comunidad sin un tratamento obligatorio, hues ta considera algo ‘inaceptabel’. Sr. Martin tin 14 dia pa por apela e sentencia.

TBS ta un ley cu tin na Hulanda y aki na Aruba ta pa prome biaha un persona ta wordo sentencia cu esaki. E ta un proceso cu ta laga e persona cu a comete un crimen bay den un tratamento pa persona cu problema mental ora e caba di cumpli su sentencia den prizon.

Na 2012 nan a modernisa e codigo penal pero te awor niun hues a imponi TBS. Un motibo grandi ta cu no tin un clinica di TBS na Aruba unda por duna e tratamento obligatorio. E ubicacion den un clinica asina e acusado, ta bin na ordo despues di cu e acusado a sinta 10 aña.

Hues a bisa cu ta haciendo un investigacion pa por habri un clinica na Corsou, pa persona condena di Aruba, Bonaire, St. Maarten, Saba y St. Eustatius. En caso cu e clinica aki no habri na tempo, OM tin cu evalua pa transferi e acusado pa un clinica TBS na Hulanda.

Ayera mainta durante e sentencia, sr. Martin no tabata presente. Tampoco e famia directo di e rumannan.