15 aña di prizon incondicional y tratamento di TBS sin un duracion defeni pa e padrastro Gabriel Martin.
Hues a hay’e culpabel di e maltrata y mata finalmente e rumannan Rishandroh (5) y Eugene (2) den un forma asina grave cu ambos mucha a fayece di nan heridanan. Tambe a condena sr Martin pa sconde e curpa di Eugene den mondi na Savaneta.
Ta pa prome biaha cu corte di Aruba ta duna e castigo di TBS. Na 2012 nan a modernisa e codigo penal pero te awor niun hues a imponi TBS. Un motibo grandi ta cu no tin un clinica di TBS na Aruba unda por duna e tratamento obligatorio.
Hues a bisa awemainta cu tin un investigacion andando pa mira si por habri un clinica na Corsou unda personanan condena na Aruba, pero tambe Boneiro, Sint Maarten, Sint Eustatius y Saba por ricibi tratamento. Sr. Martin mester sinta 10 aña prome cu e por ricibi tratamento den un clinica di TBS, hues tambe a splica. Den caso cu no tin un clinica disponibel aki 10 aña, Aruba sea Ministerio Publico mester investiga si sr. Martin por bay un clinica di TBS na Hulanda.
Sr. Martin tin problemanan psicologico grave y e chens cu e lo uza violencia contra personanan atrobe sin ricibi tratamento, ta grandi.
Awemainta durante e sentencia e no tabata presente. Tampoco e famia directo di e rumannan.
