Diaranson mainta e prome caso entre Fundacion Aruba Birdlife Conservation y Pais Aruba den cuadro cu rosamento na Bubali Plas a tuma luga. Presidente di Fundacion Aruba Birdlife Conservation, sr. Greg Peterson ta bisa cu nan ta purbando algo unico awo pa wak si nan por defende nos naturalesa a base di un caso den corte. Segun e abogado sr. Geert Rep, ainda tin hopi chens pa scapa e tereno cu a wordo rosa na Bubali Plas.
”Eigenlijk por gewoon rosa un tereno prome cu nan hasta haya cualkier permiso , esey ta un di e problema nan cu nos ta confrontando cun’e y banda di e esey nos tin e Ruimtelijke Ontwikkelings Plan (R.O.P.) cu ta para bon cla cu e area di Bubali ta Groen Gebied” , sr. Peterson a bisa.
E R.O.P. tambe tin un cierto splicacion bao di ki tipo di excepcion bo mag di traha algo eynan segun sr. Peterson, cu no ta e caso den e momento nan aki. ”Nos a purba diferente cos. Nos a purba di bin cu medida di ordo cu den todo caso e rosamento no por sigui entrante awe 1 di juni 2016” , sr. Peterson a bisa. Hues a bisa cu e ta compronde cu e parti di naturalesa aki cu a wordo rosa ta un area importante pa e parhanan anto cu e kier a pensa un tiki mas riba e proposicion aki. El a duna nos 2 siman pa e sentencia cual mi ta haya tambe ta algo nobo pa Aruba den e parti aki” , sr. Peterson a comenta.
Gobierno ta concentra mas riba otorgamento di tereno cu riba naturalesa
Hues a scucha y compronde e argumento cu a wordo treci pa dilanti di parti di Aruba Birdlife Foundation y Gobierno tambe. ”Gobierno ta practicamente mas ocupa cu e parti di otorgamento di tereno y no ta concentra mes riba e parti di naturalesa. Mi ta kere door di esaki, e por trece un balans bek den dje y nos ta hopi optimista, nos ta sperando cu nos por haya un sentencia den nos fabor pa scapa e pida tereno aki
”E lo ta algo completamente loco si tur hende por cuminsa rosa tur caminda unda cu nan kier pa despues bay wak si e por haya permiso pa un pida tereno. Esaki no por pasobra ta tereno cu ta pertenece na pueblo di Aruba anto manera hues mes a bisa, bo eigenlijk no mag di mishi cun’e” , sr. Peterson ta splica.
Ta bay bin mas caso similar na esaki
”Mi ta sigur cu den futuro otro organisacion nan tambe ta bay bin cu cierto caso, nos mes ta bay bin cu diferente tipo di caso pa hasta bay wak y test diferente aspecto nan di otorga tereno di e forma aki”, sr. Peterson ta bisa. Un di e cosnan cu ta hopi simpel segun sr. Peterson, ta eigenlijk cu ”Environmental Impact Assesment” , cual ta un proceso cu ta yuda bo midi e efectonan cu desaroyonan of proyectonan manera esun cu nan kier haci na Bubali Plas ta causa na medio ambiente. Segun sr. Peterson, esaki ta algo cu no ta wordo haci den e caso aki pa wak ki daño ireparabel esaki por tin pa naturalesa di nos isla cual mester ta cosnan basico ora ta trata cu tereno nan asina aki.
