MOZAMBIQUE – E prome casonan a ser confirma despues cu un horcan a devasta e ciudad di Beira, autoridad a anuncia riba diaranson, esaki ta hisa preocupacion pa por yuda e miles di persona cu ta den shelter den un condicion no mucho bon.
E 5 caso di colera ta na Munhaya, un di e bario cu mas pobresa, e director nacional di asistencia medico, Ussene Isse a bisa reportero. “Colera ta un situacion epidemico, ora tin un caso, tin expectativa cu mas lo bin den comunidad”, Isse a bisa,
Un preocupacion grandi pa e sobrevivientenan di e horcan cu awo ta bibando na campamento, scol, misa y cualkier parti cu tin cuminda y awa. E malesa ta bay rond pa medio di cuminda y awa contamina, ocasionando diarea, y un persona por muri den ora si no ser trata cu hidratacion oral of likido intravenal.
Organisacion di Salud Mundial a avisa di un dos desaster si otro malesa manera colera sparse rond den e region. Como 900 mil vacuna oral ta spera di yega e siman aki.
Cu miyones den necesidad di ayudo, president Filipe Nyusi a bisa siman pasa cu 1000 persona a fayece y e cifra por bira mas halto, ora cu awa cuminsa seca y ‘e cantidad precies di morto no lo sa nunca’.
Trahado di salud ta habri clinica pa asina por yuda, algun persona di e ciudad di Beira ta bebe awa cu ta stanca banda di caminda, esaki ta aumenta posibilidad caso di diarea. Otro persona ta bebe awa di pos contamina. E grupo di salud a bisa cu a mira cantidad halto di caso di persona cu diarea den ultimo dia. Agregando cu esaki por ocasiona aumento di malesa transmiti pa awa, infeccion di cuero, pulmon y malaria pa proximo dia y siman.
