Diasabra ultimo a luga e apertura di e prome Campeonato Nacional di Gimnasia Artistico na Aruba durante cual mas cu 90 atleta a competi den varios categoria y nivel diasabra y diadomingo. Bon Dia Aruba a combersa cu e presidente di e Federacion Gymnastico Arubano (FGA), Sra. Milly Bagheri, cu ta e federacion cu tabata encarga cu e organisacion di e evento aki.
Gimnasia ta un deporte cu durante e ultimo añanan a bira hopi popular na Aruba. Pa hopi aña, algun club tabata practica e deporte di gimnasia di forma recreativo, pero algun aña atras esaki a bira mas serio y a cuminsa participa den competencianan internacional.
Sra. Bagheri a splica cu como federacion, nan a organisa pa prome biaha na Aruba, un campeonato nacional caminda cu e tres clubnan cu ta miembro di e federacion, Club Avanse, Club Gihae y Club Perla, a bin cu nan grupo competitivo pa asina FGA por tin un bista con e clubnan ta trahando cu e atletanan pa asina den futuro tin un grupo di seleccion cu lo por bay representa Aruba.
El a indica cu ya caba tin un seleccion cu ta representa Aruba, pero mester busca atletanan cu lo bira e futuro miembronan di e seleccion, pasobra e atletanan actual ta bira grandi y ta pasa over na otro nivelnan. E campeonato nacional ta duna FGA un bista riba e pre-seleccion pa Aruba.
Pa loke ta e evento y con esaki a bay den su totalidad, Sra. Bagheri a bisa cu e actividad a bay hopi bon. FGA a trece tres hurado internacional pa e campeonato nacional cu tabata encarga di husga e muchanan durante e dos dianan di competencia.
El a agrega cu durante e competencia, e huradonan a haci uso di e sistema online di husgamento cu nan tin acceso na dje via e miembresia di e Confederacion Suremaricano di Gimnasia (Consugi), cual a facilita e husgamento online unda cu tur e puntonan y e nomber di e atletanan ta sali riba e screen cu ta haci e evento uno hopi profesional.
“Pa prome biaha e ta algo historico. Mi ta hopi contento cu tur e organisacion y mi ta hopi contento di tur trabou cu no solamente e miembronan di federacion a haci, pero tambe e clubnan, e coachnan, e atletanan, mayornan y tur cu a traha hopi duro pa nos tin un bunita evento,” Bagheri a expresa.
Papiando di evaluacion y futuro di e campeonato, e presidente di FGA a indica cu na final, nan ta bay evalua con e evento a bay pa mas cu claro mehora y el a splica cu e plan di e federacion ta pa e campeonato nacional tuma luga tur aña. “Tur aña nos tin cu tin nos campeonato nacional. Esey ta e plan.”
El a agrega cu loke nan ta evaluando ta si nan por, den futuro, organisa un competencia di gimnasia artistico internacional na unda cu ta invita otro paisnan pa bin Aruba y participa den un campeonato internacional.
“Esaki ta nos prome stap pa nos wak con e organisacion a bay, e trabou, kico tur mester, pero mi ta hopi contento y hopi orguyoso di full e team y e ta un evento hopi bon organisa,” Bagheri a finalisa.
