Plan pa e prome caminata espacial completamente femenino den historia a wordo cancela pa falta di un di dos trahe espacial, segun e agencia espacial Mericano.
Christina Koch y Anne McClain tabata prepara pa bay pafo di e Stacion Espacial Internacional (ISS) diabierna pa instala bateria.
Pero a bin resulta cu tur dos tabatin mester di un trahe taya medium, pero tabata un so cla pa uzo.
Koch awo lo sali di ISS cu su colega masculino, Nick Hague.
E lo bisti e trahe taya medium cual McClain a uza den su caminata espacial cu Hague siman pasa. McClain a train den tanto e trahe taya medium como esun taya large, pero te despues di su caminata el a ripara cu esun medium ta ked’e miho, NASA a bisa.
E tin plan pa realisa su proximo caminata espacial, dia 8 di april proximo, cu otro astronauta masculino, David Saint-Jacques.
E problema ta sinta cerca e torso of ‘camisa’ di e trahe. NASA tin dos torso taya medium den ISS, pero solamente un ta configura corectamente pa un caminata espacial. Pa prepara e otro lo dura oranan, y NASA a dicidi cu lo ta mas facil y rapido pa cambia e astronautanan.
Brandi Dean, vocero di e Johnson Space Center na Houston, a splica cu rekerimento di taya por cambia unabes astronautanan ta den espacio. “E necesidad di taya di cada individuo por cambia ora nan ta den orbita, como respuesta pa e cambionan cu bibando den microgravedad por causa den curba”, el a bisa, añadiendo cu taya medium, large y extra large ta disponibel.
