E unidad di K9 di Cuerpo Policial di Aruba ta masha tristo cu fayecimento di nan agente canino “Britt” cu a bay laga nan recientemente. Agente Vianney Coffie a duna di conoce cu “Britt” tabata un tremendo cacho y e tabata parti di e inicio di K9 Unit aki na Aruba.
Siguiendo e pasonan di ex Inspector Josefa, kende tabata un di e prome nan cu a cuminsa uza cacho den e trabou diario di Polis, Vianney Coffie a sigui cu e trabao aki y a bin cu “Britt” kende a bira e prome cacho oficial den existencia di Cuerpo Policial su 25 añanan. “Britt” tabata procedente di Checoslovakia.
Vianney Coffie a agrega cu e mester a bay un opleiding pasobra Comisario di Polis mester a haya un persona y un cacho cu por demostra den un periodo di 4 aña si en berdad tabata hustifica pa por bin cu un departamento cu mas cachonan tactico cu por yuda cu combatimento di criminalidad. Mirando e conocemento cu e tabata tin, Coffie a wordo acerca y no tabata kier a perde tempo den haya e “right man on the right spot” y esey tabata su persona.
A sigui e opleiding y a sigui cu tur e rekisitonan. Locual ta straño ta cu el a cuminsa cu un otro cacho y faltando tres siman pa su examen final e cacho aki a dicidi cu e ta “wijk af”. Un decision a cay cu e mester a bay conoce su di dos partner di cuater pia a resulta di ta “Britt”.
Tempo tabata cortico y Coffie a sigui kere den locual e por a haci y a hinca su confianza den e cacho. Na Corsou, na momento cu e instructornan a haci esaki un realidad, a logra den un forma fructifero cu “Britt” a pasa e examen hunto cun’e den e tres siman ey, cu normalmente lo mester tabata tres luna.
“Como profesional, cu hopi ambicion den criamento di cacho, hamas y nunca mi a topa un cacho asina aki. Si e bestia aki por a papia cu mi, mi ta kere lo tabata algo hopi grandi”, Coffie a expresa.
“Britt” a bira amigo di un y tur. Sinembargo a yega riba un dia hopi tristo ya cu den e training di e cacho Coffie a hunga un rol hopi grandi. “Mi a haci hopi esfuerso den e weekendnan pa mi por a pasa examen cun’e y trec’e Aruba cu e por a converti su mes den e heroe cu e tabata te cu ora cu el a fayece”, a bisa.
“Britt” a participa den casonan caminda tabata tin placa, droga envolvi of scondemento di arma y bala, entre otro. For di “Britt” Coffie a siña e trankilidad cu e cacho tabata traha cun’e. “E tabata logra su metodonan conforme su trankilidad, pero semper e tabata duna resultado positivo”, a manifesta.
“Britt” a fayece cu 10 aña di edad, cual el a haci 3 luna pasa. E tabata sufri di un enfermedad cu practicamente ora cu cachonan hay’e nan ta muri di biaha. “Mi ta hopi satisfecho cu mi por a lag’e biba cu mi e 10 añanan aki mirando cu e no tabata facil. Pero mi a dun’e e luga cu e tabata merece. Awe el a bisa mi ta basta y a entrega mi e corona di dje pa asina mi por sigui efectua e bon trabaonan cu nos a yega di haci den pasado”, asina Vianney Coffie a expresa den un forma masha emocional y tristo.
