Ayera mainta e presidente di parlamento den fase transitorio, Guillfred Besaril (MEP), a haci su prome bishita oficial na un instancia den capacidad di su funcion nobo. Sr. Besaril a elabora un poco riba e proceso di formacion di gobierno. Tambe el a splica cu probablemente cartera di Husticia lo cay bou su persona of colega Andin Bikker.

E bishita aki pa sr. Besaril tabata manera un oportunidad pa bay cas bek, mirando cu e ta un polis y e bishita tabata pa Cuerpo Policial, cual a tuma luga na Centro di Husticia na Santa Cruz.

Prome biaha cu polis ta bira presidente di parlamento
Alto comisario Dolfi Richardson tabata presente y a expresa su orguyo cu pa prome biaha den historia un polis ta ocupa e funcion di presidente di parlamento. “Nos tin cu elogia e momento pasobra e ta e prome biaha cu un polis ta ocupa loke mi ta haya e funcion mas halto cu nos constitucion ta describi. Hopi biaha hende ta pensa cu un minister ta un funcion cu mas peso pero si nos mir’e di banda staatkundig, e presidente di parlamento ta esun sinta riba e organo mas halto di nos pais”.

 Sr. Richardson a gradici e presidente di parlamento tambe pa ta e prome mandatario despues di eleccion cu a acerca Cuerpo Policial pa sinta hunto.

 Aunke sr. Besaril a splica cu e lo fungi den su capacidad como presidente pa e parlamento por funciona den su periodo di transicion, esaki no kiermen cu den futuro lo e sigui den e funcion aki. Kico lo pasa cu ne lo mester wordo determina despues cu gobierno forma oficialmente. Sinembargo sr. Besaril no kier a laga e momento aki pasa bay sin reconoce e significado di e momento aki, pasobra historia a wordo skirbi. Esaki el a dicidi despues cu otro persona cu mas aña laborando den parlamento a pone e presidente na altura cu esaki ta un momento historico.

 Di su banda sr. Besaril tambe a gradici alto comisario pa e oportunidad di por forma parti di Cuerpo Policial, “mirando cu cuerpo a tuma mi y a educa mi desde cu mi a yega na su portanan den 1993, pues ta pa via di e organisacion aki mi ta sinta riba stoel di presidente awe.”

 Tareanan di presidente
Presidente di parlamento a splica cu esaki ta e prome bishita oficial cu e ta haci, pero lo tin mas bishita cu lo tuma luga den e simannan nos dilanti. Un departamento en particular cu sr. Besaril sigur lo kier bishita ta Directie Wetgeving en Juridische Zaken. E departamento aki segun e presidente ta uno cu ta traha hopi di cerca cu parlamento. Tambe e presidente a expresa cu lo e kier sinta na mesa cu e veiligheidsdienst, tanto como Ministerio Publico, e poder hudicial y Conseho Consultativo.

 “Mi tin e tarea pa lanta e fundeshi di e siguiente presidencia di parlamento, sea cu ami mes lo sigui presidi esaki of otro persona lo tuma e asiento”. Sinembargo sr. Besaril a expresa cu su sintimento pa e posicion ta uno mixto. “Na e momento cu nan a bati na mi porta pa e honor aki, mi no tabata consciente di tur loke e ta trece cu ne. Mi ta hay’e bunita pero e honor y kico tin cu sosode ta 2 cos hopi diferente”.

 Akinan sr. Besaril ta splica cu su deseo ta pa por drecha e inkietudnan cu tin den e diferente departamentonan, y specialmente den Cuerpo Policial. Pa por atende cu e inkietudnan aki e esfuerso mester bin di e organo ehecutivo. Esaki ta algo cu segun sr. Besaril nan como partido a campaña pe, pero pa awo e ta mira cu e lo enjoy the ride te cu por dicidi den ki direccion ta bay.

Proceso di formacion
E prome reunionnan cu presidente di parlamento a atende desde cu el a wordo huramenta tabata cu gobernador Alfonso Boekhoudt. Entre gobernador y e presidente a discuti cua sentimentonan sr. Boekhoudt tin pa loke ta trata desaroyonan den parlamento y kico e lo kier mira di e organo aki. Tambe gobernador a haci algun recomendacionnan na presidente di parlamento.

E proximo reunionnan cu a tuma luga tabata trata cu e proceso di formacion di gobierno cual formado Evelyn Wever-Croes ta hibando dilanti. Riba e punto aki naturalmente ta tende regularmente con e desaroyonan ta bayendo. Segun sr. Besaril, e acuerdo di gobernacion cu a wordo firma diaranson ultimo ta un traduccion di resultado di eleccion riba 22 di september. Segun sr. Besaril e plan di gobernacion cu e 3 partidonan cu lo drenta den coalicion ta basta extenso. Pues segun e presidente di parlamento ‘ora bo drenta den gobernacion bo sa di antemano kico lo bira un prioridad. Nos kier set the tone. Asina aki nos por midi kico nos a logra ora nos a compromete nos mes’. Esaki segun sr. Besaril ta e prome biaha cu ta bin cu e proceso aki prome cu forma gobierno.

Pues actualmente nos por mira cu e proceso di formacion ta andando den fase cu ta determina con lo defini e ministerionan, awo cu tin un plan di gobernacion. E plan aki sr. Besaril a splica cu ta e sintesis di e diferente ideanan cu ta para central den cada un partido cu lo forma parti di e coalicion.

 Organisacion di ministerio
“Por ehempel awe bo tin un ministerio di medio ambiente cu ta cay bou economia. Bo tin cu puntra bo mes si di berdad tin un logica tras di pone medio ambiente hunto cu economia. Dicon por ehempel no ta pone bou economia labor y asuntonan di stranheria? E maneho di inmigracion ta influencia e mercado laboral y e mercado laboral ta influencia e economia y vice versa. Esaki ta djis un ehempel di e pensamentonan y combersacionnan cu ta andando actualmente”.

Na mes momento ta considerando ken ta e personanan corecto pa carga cierto responsabilidad. Sr. Besaril a duna e ehempel cu si e wordo acerca pa bira minister di infrastructura, e no lo tuma e posicion. “Mi no sa lesa mapa di construccion, ni un clabo mi sa bati. Pues e persona corecto mester haya e responsabilidad adecua cu nan experiencia”.

Segun sr. Besaril, Formador a inform’e cu pronto lo cuminsa cu e proceso di screening pa candidatonan cu lo kier postula nan mes como minister. Specificamente pa loke ta trata ken lo bira Minister di Husticia, sr. Besaril a expresa cu e cartera aki probablemente lo cay den scochi di su colega Andin Bikker of su persona mes. E cantidad di minister cu lo wordo despacha, segun sr. Besaril no ta sigur ainda. E lo por ta 7 of 8 posiblemente.

Cantidad di minister y coordinado
Manera Bon Dia Aruba a yega di trece dilanti den pasado, den diferente articulo y editorial, baha e cantidad di minister no ta kico lo baha gastonan relaciona cu gobernacion. E big money ta den e gran cantidad di coordinadonan cu e ministernan tin na nan disposicion. Riba esaki sr. Besaril a comenta cu nan como partido a campaña cu e idea aki mas a base di principio. “Sigur nos kier baha e gastonan di gobierno y p’esey 7 minister ainda ta keda e punto di salida. Esaki mester wordo negocia ainda. Pero nos kier duna ehempel. Ora bo duna ehempel bo no por pidi e homber y muhe comun pa mara faha mientras abo mes ta keda biba den grandi”.

Sinembargo sr. Besaril a reconoce cu tin un cantidad alarmante di coordinado den gobierno actualmente. “E ultimo estadistica cu mi por a tuma nota di dje tabata trata di mas cu 368 coordinado. Mi a yega di papia cu diferente ex ministernan y den mayoria nan a expresa cu nan a drey nan bureau cu 15 pa 20 hende. E ora ey mi tin cu puntra mi mes con a yega na un situacion asina”.

Segun sr. Besaril mas alarmante ainda ta cu e cantidad por ta mas halto mirando cu, “hopi di nan a bira contractor, e ora ey nan no ta cay bou payroll como coordinado si no riba payroll di gobierno como servicionan rendi.”

Mas cu esaki sr. Besaril no kier a comenta mirando cu sra. Wever-Croes ta esun encarga cu e proceso di formacion.