Aruba Tourism Authority (ATA) ta informa cu e siman aki ta ‘celebra’ e yegada di e prome 700 mil pasahero di barco crucero cu ta bishita Aruba.
“Aruba Tourism Authority hunto cu Aruba Ports Authority (APA) ta trahando hunto pa promocion di e experiencia cu nos bishitantenan crucero ta haya na momento cu nan barco mara na nos isla. Ademas di e obhetivo aki, tambe ta comparti e vision di un bon relacion cu companianan di barco crucero, mehoracion di infrastructura y e trato amabel cu e bishitantenan ta haya di nos comunidad”, asina ATA ta bisa.
“Globalmente, mayoria di e mas cu 20 miyon persona cu ta subi un barco crucero, ta scoge un cu ta keiro den Caribe. Aruba, atraves di AATA y APA ta busca pa bira e destinacion mas memorabel, un cu e pasaheronan lo kier bishita bek pa pasa mas tempo. Di e manera aki ta yega na un turismo sostenibel cu resultadonan positivo riba termino corto y largo.” Nan ta indica tambe ta cu un di nan metanan pa 2018 ta pa aumenta e bishita di turista crucero cu un minimo di 7% compara cu 2017. Tambe nan meta ta pa desaroya e lasonan comercial cu e industria crucero cu mira riba 2019 y mas leu enfocando esfuersonan riba diversificacion y garantisando bishitanan pa nos destinacion durante low season. “Como tambe bishitanan mas largo, stimula e consumo di turista y tripulacion di crucero riba nos isla, y crea programanan pa aumenta e conversion di e turistanan crucero pa turistanan stay-over”, asina e oficina di turismo ta comenta.
Estadistica cu ATA ta dispone di dje, ta indica cu pa fin di 2017, e entrada for di sector crucero lo alcansa 85,5 miyon dollar, cual ta representa un aumento di 21% compara cu 2016. “Ta premira cu Aruba lo keda conoce desaroyonan alentador manera esaki, mientras cu A.T.A. ta sigui traha di cerca cu tur socio den e gremio. Ta fomentando un bon relacion cu tour operator nan y comerciantenan di e area, ademas di otro entidadnan publico y priva.”
Bon Dia kier añadi na e relato di ATA aki cu un poco tempo pasa e director di APA a bisa nos cu mester regla e fluho di turista miho y tambe wak cu Aruba no ta haya asina hopi turista cu e turistanan mes no ta gusta esaki mas. Pa motibo di esey e director a bisa cu mester balansa esaki miho. Un otro punto ta, cu segun ATA e crecemento di turistanan crucero ta e efecto di nan esfuersonan di promocion. Sinembargo no ta cla kico e efecto di e horcan pa St.Maarten ta riba e cifranan di nos, como cu barconan crucero a dicidi di no bay e isla afecta mas. Y nan a dicidi di bay Aruba (y tambe Corsou) cu asina por mira un fluho mas grandi di turistanan crucero riba nos isla. E puntonan aki nos lo trece dilanti na directiva di ATA pa un comentario.
