Mediante un comunicado di prensa Minister di Labor, Energia y Integracion, Glenbert Croes, a anuncia cu diahuebs 15 di februari cu e prome barco di “heavy fuel oil” (HFO) a yega Aruba for di Venezuela.
E meta di e esaki, el a indica, ta pa logra baha e tarifa di awa y coriente na Aruba. Esaki gobienro kier logra hibando un maneho pro activo y un di e manehonan cu nan a bin ta activando y gestionando ta pa por tin diferente oportunidad y alternativa di suministro di combustibel.
A pesar cu e proyecto di Hydrogen Valley y e transicion pa LNG ta “andando”, Minister Croes a splica cu mester sigui cumpra “heavy fuel oil” cu ta cumpli cu e specificacionnan cu WEB ta exigi, pero di paisnan cu ta ofrece mas barata por yega na e meta di baha e prijs di awa y coriente.
E mandatario ta remarca cu un di e prioridadnan di Gabinete Wever-Croes ta pa combati costo di bida y cu baha e tarifa di awa y coriente,ta un punto fundamental, pero e efecto aki toch pueblo no ta bay sinti di biaha.
Durante e tratamento di presupuesto 2024 den luna di december ultimo Minister Croes a splica cu e transicion di HFO pa LNG ta baha prijs di awa y coriente, pasobra LNG ta mas barata cu HFO, pero el a remarca cu en realidad e gasto di awa y coriente no por baha inmediatamente.
El a bisa cu LNG ta mas barata cu HFO, p’esey gobierno ta bay haci e switch y tambe pasobra LNG ta mas limpi cu HFO y ta ocasiona menos daño na medio ambiente, pero mester haci un inversion cuantioso pa por ricibi e LNG den WEB su facilidad y sistema pa usa. Door di e inversion cuantioso ey no por reduci e tarifa di awa y coriente inmediatamente.
