Diamars dia 5 di maart pa 9or di mainta a zona e alarma di emergencia di WEB Aruba, caminda nan a sigura cu esaki ta bay sucede tur prome diamars di cada luna pa contratista, empleado y bishitantenan custuma cu e zonido, den caso di un crisis real.
Mediante un publicacion riba Facebook, WEB Aruba N.V a informa cu “di awor en adelante lo zona e alarma di emergencia di WEB tur PROME diamars di luna pa 9or di mainta. Door di zona e alarma di emergencia tur prome diamars di luna, empleadonan, contratistanan y bishitantenan di WEB lo por custuma cu e zonido. Asina nan lo por reconoce esaki den caso di un crisis real y si mester evacua.”
Pa esaki, usuarionan di rednan social a reacciona na unda un di nan a señala cu “ta peligroso ora custuma cu algo, e ta bira automaticamente algo normal. Pero mester distingui y reconoce e zonido.” pa esaki WEB Aruba N.V a sigura cu aparte di esaki, nan empleadonan ta haya training y informacion regular pa sa ki ora tin emergencia di berdad. Den caso aki no mester a haci nada, simplemente a notifica habitantenan pa nan sa, ora nan tende e zonido di alarma cada prome diamars di luna y cu esaki ta conforme WEB su plan di calamidad.
Den e pregunta ki sorto di calamidad, nan a declara cu por ehemplo, ora tin un horcan of un candela den planta, e por ta tur tipo di calamidad, e zonamento di e alarma no ta pa evacua.
Entre otro, comentario a bin dilanti “Si tin un alarma awor ta significa tin peliger eyden just asking paso tanto siglo sin alarma y awor de repenti of WEB ta birando mas updated ? y WEB a contesta cu “absolutamente cu no. Ta hustamente pa ta prepara den caso di un emergencia.”
Importante ta pa reitera cu esaki ta bay zona un biaha pa luna so, cu ta e prome diamars di cada luna pa 9or di mainta y no tur ora.
