Den pasado, Bon Dia Aruba a entrevista Karolina Span tocante su amor pa obra di caridad y su isla. E hoben actualmente ta haciendo investigacion tocante cuido pediatrico na Aruba y ta comparti cu nos kico el saca afo te cu awo y pakico e topico tin importancia.

Sra. Span, kende tin 22 aña y ta studiando health care administration na Coastal Carolina University, ta conta: “Mi a bay analisa Aruba su cuido pediatrico pa wak kico nan tin falta di dje. Mas tanto con nan interactua cu pashent. Mi kier introduci un programa cu ta sigura cu pashentnan pediatrico ta wordo poni como prioridad y cu ta sigura cu e cuido no ta uno traumatico. Mi a observa mas cu 100 pashent entre 0 pa 16 aña y entrevista mas cu 40 mayor. Mi a haya sosten di mayoria di pediatra riba e isla mas sinembargo maneho di hospital no ta wak e necesidad pa pusha e proyecto. Mi tin casi un aña ta haci trabou boluntario na hospital pa mustra cu tin un necesidad pa esaki.”

Honestidad den cuido
Segun sra. Span, muchanan hopi biaha ta asocia cuido medico cu algo cu ta bay causa nan dolor. Esaki ta pasobra den mayoria di ocasion nan no sa kico ta bay pasa. E ta subraya: 

“Mi ta mira cu hopi biaha muchanan ta haci scandal y ta show tantrums (frustracion) cu ta wordo causa pa stress emocional. Esaki ta pasobra hopi biaha nan no ta wordo splica precisamente kico ta bay tuma luga. Pa mi investigacion, mi a sigura cu muchanan tin un comprension completo di kico ta bay pasa cu nan, pa nan no wordo gaña. Durante algun procedura mi tabata keda hunga cu nan y splica kico ta bay tuma luga pa medio di uza apps nan di hunga riba un Ipad, pinta y cosnan asina.”


Hospital
E ta comenta cu un di e cosnan cu ta traha contra su proposito pa cu e proyecto ta cu e ta sinti cu hospital no ta comprende su estudio precisamente y ainda nan ta kere cu e ta un sorto di “speelleidster”. Pero en realidad, su estudio ta busca pa bienestar di cuido medico y e personal di hospital en general.

“Mi ta comprende nan ta riba un budget, cu nan tin problema cu deficit di personal y cosnan asina. Pero introduci algo asina ki lo sostene e personal di hospital tambe. Ya cu nan lo tin menos presion emocional ora e ta yega na trata cu muchanan cu no kier colabora. Pa medio di duna muchanan recompensa prome, durante y despues di un procedura medico, e proceduranan aki ta bira menos traumatico pa nan. Mi a conduci encuestanan cu ta ilustra con e actitud di un mucha ta bay di nervioso pa calmo ora e metodonan di distraccion a wordo uza riba nan. Nan a colabora cu e dokternan mas cu esunnan cu no a pasa pa medio di e metodonan aki.”

E hoben ta conclui bisando cu e ta importante pa muchanan no mira cuido medico como algo traumatico ya cu esaki ta sigura cu den futuro nan lo ta miho pashent. Sra. Span ta bisa cu su investigacion ainda ta tumando luga y awo e lo cuminsa enfoca riba e beneficionan financiero di e programa cu e kier introduci. E ta comenta “Mi opinion personal ta cu pasobra mi no ta enfoca riba sector priva y mi ta luchando pa algo cu no lo beneficia hende monetariamente, nan no ta worry mucho. Pero esaki ta algo importante.”