Departamento di Salubridad Publico (DVG) hunto cu expertonan di Pan American Health Organization (PAHO) ta den proceso pa organisa un programa nacional di vigilancia y control di enfermedadnan asina yama Zoonotico. Tin reunionnan tumando luga caba entre diferente sector di salubridad.
Bao di enfermedadnan Zoonotico, ta cay enfermedadnan cu ta of por wordo transmiti door di bestia pa hende. Experto Natalia Casas di PAHO, kende ta coordinador di e proyecto, a indica cu DVG a invita nan pa asina traha hunto riba e programa aki. DVG ta laga sa cu ta hopi importante pa tin un bista real di e situacion na Aruba na e momentonan aki pa por traha un programa di vigilancia, monitor y control di e tipo di enfermedadnan aki. Departamento di Salud a haya bishita na diferente di su seccionnan y tambe na Departamento di Agricultura Cria y Pesca. Nan a bishita algun cunucu tambe unda tin criadero di bestia como tambe veterinarionan priva.
Cambio di clima
Dr. Wilmer Salazar, como medico microbiologico y alabes consehero medico di DVG, a subraya e cambio di clima cu ta hunga un rol den esaki. Sr. Salazar: “Teniendo na cuenta cu rond mundo tin cambio di clima y tin e parti turistico unda e personanan ta bishita regionnan salvahe of paisnan exotico. Esaki cu consecuencia cu un persona of bestia por trece un of otro enfermedad cu lo por ta un peliger pa nos habitantenan, incluso pa nos turismo.”
Rabies
Sr. Salazar a agrega cu na Aruba tin hopi bestia domestico manera cacho, pushi, parha y tambe otronan cu ta pa cria y bestianan salvahe cu por tin enfermedad cu ta representa un peliger pa ser humano. E programa nobo aki ta pa monitor, vigila y contene e enfermedad na un manera mas lihe. Segun dr. Salazar entre e enfermedadnan aki tin rabies. Na Aruba no tin rabies, pero mester sigui vigila segun DVG. Nan ta bisa cu tin bestianan cu lo por drenta e isla na un manera ilegal, por ehempel door di contrabanda y mester tin bista riba esaki. A indica cu e mascotanan tambe por tin enfermedad cu por afecta e hende cu e ta biba cu ne manera scabies y problemanan di parasito intestinal. Mester remarca cu tin mas otro sorto di malesa procedente di bestia cu lo por representa un peliger pa hende.
Animal ilegal
Aña pasa un boto a drenta Aruba cu algun animalnan cu a wordo transporta den un forma ilegal. For di aña pasa october cu nan a drenta, ainda Bon Dia no a logra haya informacion riba ken a trece e bestianan aki, pakico, y con a para cu nan. Specialmente riba e parti di enfermedadnan, Bon Dia tin basta siman ta warda riba DVG pa aclara si e bestianan aki por a trece algun tipo di enfermedadnan cu nan cu lo por tin consecuencia pa nos na isla. Manera cu nos a informa caba, Bon Dia a purba busca informacion na Veterinaire Dienst kende ta prohibi door di DVG di duna nos e informacion aki. Mientras tanto nos a ricibi indicacionnan fuerte cu e departamento menciona ta bon na haltura di kico e situacion real ta. Minister di Salud a laga sa na nos redaccion cu e lo sinta pronto cu Bon Dia Aruba riba e tema aki.
