Stichting Rancho ta organisando nan actividad Marshe Rancho cu lo tuma luga dia 30 di september. Den un combersacion cu Srta. Ginelly Quant, coordinador di Stichting Rancho y tambe Sr. Clifford Rosa, president di e stichting, nan ta conta nos un poco mas di e actividad y kico e programa nobo di Stichting Rancho ta encera.

Stichting Rancho ta iniciando un porgrama nobo di un aña bao di fondonan di CEDE Aruba y Samenwerkende Fondsen. E programa nobo aki, Food Security, ta principalmente pa garantisa e alimentacion y cuminda pa e bario en general y ta bay combina esaki cu e actividad di Marshe Racho.

Srta. Quant ta conta kico tur e actividad di Marshe, cu lo tuma luga dia 30 di september na Visstraat, localidad nobo di Centro di Actividad Rancho. Cuminsando pa 4or di atardi, ta bay tin un mercado local pa henter e comunidad di Aruba. Banda di esey lo tin tambe un walking tour cu lo explora un poco mas e bario di Rancho y lo tin tambe un charla di arte-terapia, presenta pa e arte- terapista Natalia Maduro.

Quant ta splica cu bao di e capa di e programa Food Security nan kier garantisa e parti basico di alimento; “dus garantisa cu e hendenan tin cuminda, y si algo mester pasa mañan, otro mañan, cu atrobe nos tin un pandemia, nos kier garantisa cu e hendenan por bin akinan y tin simia of un mata cla pa nan, esey ta e meta”.

“Banda di esey nos kier duna e productornan local e oportunidad tambe pa tin un espacio, bao di Marshe Rancho, cu nan por ofrece nan productonan. E pandemia a mustra cu ta dificil, nos a ripara cu hopi hende den e bario tabata depende di locual ta e paketenan di cuminda, pero nos no a wak nada den e parti di alimentonan un tiki mas fresco, manera berdura, fruta”, el a agrega.

Srta. Quant ta splica tambe cu Rancho a haya inspiracion di Corsou, unda cu tin un marshe grandi na e playa unda cu nan ta trece productonan fresco. Y mirando cu den pasado na Aruba tabatin e marshe di berdura fresco na playa, hopi hende ta puntra nan pa tin esey atrobe, y p’esey a bin cu e idea di Marshe Rancho.

“Nos inicia cu marshe eigenlijk dos aña pasa caba, pero durante un periodo cortico pasobra nos tabata warda ariba e fondonan cu aworaki a yega cu nos por sigui hacie bao di capa di Food Security”, el a bisa.

Aworaki Centro di Actividad Rancho ta bay cambia su programa. Den pasado nan tabata enfoca mas tanto ariba tayernan di arte y monumentonan, pero pa motibo di e fondonan ricibi bao di e programa di seguridad alimentario, e stichting lo enfoca ariba esaki prome y despues los sigui cu otro tipo di tayernan.

Sr. Rosa tambe a duna un update ariba e proyecto grandi di ‘Sister Cities’ y e celebracion di 200 aña di Oranjestad. Segun e ta splica, e proyecto Sister Cities ta den un bon proceso na Merca y Boston, cu aworaki ta pasando door di e tramite pa nan por bira e proximo sister city di Oranjestad. “Esey ta sumamente importante pa Stichting Rancho, mirando cu intercambio di cultura, cu informacion y cu tur e oportunidadnan cu por tin entre Rancho y Boston ta hopi importante pa analisa y pa traha hunto” el a bisa.

“Esaki teniendo na cuenta e punto di enfoke, cual ta celebrando 200 aña di Oranjestad. Y nos mester tene na cuenta toch nos muchanan Arubiano rond di mundo, dus eigenlijk e yamada ta bay pa tur Arubiano afo di Aruba pa tene cuenta mirando cu nos ta preparando pa e prome actividadnan den luna di april 2022, caminda e ora ey lo tin mas movecion di con nos ta celebrando e 200 aña di Oranjestad, cu nos partnernan nacional y internacional”, el a agrega.

Sra. Natalia Maduro, arte-terapista cu ta encarga cu e charla di arte-terapia cu lo tuma luga dia 30 di september despues di Marshe Rancho, a splica un poco mas kico realmente e charla aki ta encera. “E charla lo ta tocante e importancia di e forma di expresion di arte. Mi kier duna un splicacion di e conexion, e importancia pa nos por expresa nos sentimentonan y tambe duna lagun ehercicio cu hopi hende por haci na cas pa traha riba bo mes den cierto momentonan di stress y kico asina bo por haci”, el a bisa.

“E ta importante tambe pa para keto na unda bo ta y scucha bo mes tambe un rato. Nos ta den un mundo cu ta hopi lihe y nos tin e tendencia di ta mas enfoca ariba materialismo. E tipo di charlanan aki ta importante pa para keto na esey y nos tin cu mantene nos salud mental, interno, nos conexion cu nos mes pa asina nos por ta resiliente pa e cosnan cu ta pasa den bida”, el a agrega.

Pa finalisa Srta. Quant y Sr. Rosa a extende nan invitacion pa henter pueblo di Aruba pa bishita Marshe Rancho dia 30 di september, y tambe a haci un yamado na tur agricultor y artista local pa participa den e evento aki. Pa cualkier informacion por tuma contacto cu Stichting Rancho.