Den nan programa di gobernacion Gabinete AVP-FUTURO ta duna un splicacion amplio di e strategia y plan pa logra un maneho economico inclusivo, cu tin como meta mehora e poder di compra, baha e costo di bida, mehora e clima di inversion, stimula diversificacion di Aruba su economia y stimula un economia mas sostenible y duradero, entre otro.

Pa logra esaki, parti di e strategia di gobierno ta encera cooperacion estrecho entre ministerionan. Hunto cu ministerio di Energia lo explora oportunidad cu Surinam y Guyana pa uso di e tankinan riba tereno di refineria como deposito di petroleo pa compania internacional; lo desmantela e infrastructura di refineria y sanea e tereno; lo busca inversionista pa usa parti di e tereno di refineria pa Bitcoin mining; y lo promove e parti di tereno contamina pa instala un parke di panel solar pa reduci e gasto di coriente pa comunidad.

Hunto cu Ministerio di Cultura e meta ta pa desaroya San Nicolas como capital di arte, cultura y historia; lo stimula e Orange Economy den combinacion cu un programa di guia; y lo inventarisa y inicia un plan di restauracion di monumento, incluyendo designacion como monumento protegi.

Tambe gobierno lo construi un escenario permanente den Carnaval Village pa por organisa evento grandi di cultura, Carnaval, concierto, etc. y evalua con por percura pa Carnaval Village ta maneha na un forma profesional y continuo; y lo evalua si por funda museonan manera un Caribbean Museum y finalisa e proyecto di Carnaval Museum.

Desaroyo di industria creativo tambe ta forma parti esencial di e strategia di Gabinete AVP-AFUTURO pa un desaroyo economico sostenible y duradero. Pa stimula desaroyo di industria creativo gobierno lo reconoce y formalisa e industria creativo cu implementacion di un maneho actualisa pa e Industria Creativo y Cultural (Orange Economy); lo inventarisa henter e Industria Creativo y Cultural (mapping); y lo stimula un aliniacion entre departamentonan gubernamental y fundacionnan cu ta activo den e sector creativo y cultural.

Gobierno lo revisa e uso di fondo publico den e sector creativo den e ultimo 10 aña y optimalisa e alocacion di subsidio a base di criterio nobo basa riba creatividad, caracteristica Arubiano y capacidad di desaroyo local; y lo crea den cooperacion cu instancianan financiero un fondo pa financia proyecto y empresa den e industria creativo na un interes reduci (Creative Fund).

Tambe lo evalua y continua cu tayernan pa empresarionan creativo y continua cu e Creative Business Academy; lo identifica y busca tur oportunidad pa obtene fondo local, regional, den reino y Union Europeo pa financia e industria creativo na Aruba como un sector economico nobo; lo introduci incentivo fiscal pa importacion di material, instrumento y tur otro artefacto necesario pa desaroyo di industria creativo y stimula inversion den e sector; lo stimula den forma structural e educacion di arte na scol basico y secundario cu participacion di artista local; y lo stimula inclusion di arte, musica y otro elemento cultural di Aruba den e industria di turismo.

E maneho economico di Gabinete AVP-FUTURO tambe lo enfoca riba hunto cu tur e ministerionan continua cu e implementacion di e Sistema Nacional di Estadistica (National Statistisch Systeem of NSS) pa Aruba tin data necesario pa monitor progreso, identifica area di mehoracion y tuma decision a base di informacion confiabel cual ta den beneficio di tur ciudadano.

Ademas lo facilita y acelera e publicacion anual di e cuentanan nacional di Aruba (National Accounts); lo traha riba e maneho economico hunto cu e islanan ruman Corsou y Boneiro pa medio di e cooperacion cu Hulanda y a traves di Landspakket. Mescos cu Colombia y Surinam.

Gobierno nobo lo continua cu ehecucion y pusha e implementacion di proyectonan den Landspakket; lo continua cu ehecucion di e programa nacional pa muchanan spaar (National Children Savings Program) cu tin como meta cu cada mucha tin un cuenta bancario pa spaar y cu gobierno bin cu accion concreto, hunto cu sector priva, pa stimula cu mucha ta spaar; y lo implementa e plan nacional pa reduci economia informal.