Gabinete Wever-Croes II a publica nan plan di gobernacion pa e periodo di gobierno actual. E documento ta duna pa cada ministerio un resumen extenso di e vision encuanto e tareanan primordial cu ta mira nan dilanti. Den e parti introductorio di e plan e dos responsablenan maximo, Prome Ministro Evelyn Wever–Croes y Vice-promer ministro Ursell Arends, cu a firma pa e plan, ta vocifera cu vision, meta y puntonan di salida ta cuadra cu e metanan di desaroyo (sostenible) internacional (SDG, manera formula pa Nacionnan Uni).

Tambe nan ta mustra riba e necesidad di cooperacion estrecho entre e ministerionan pa por realiza e obhetivonan, pa brinda Aruba un gobierno solido y stabil. “Nos ta consciente cu e retonan ta grandi, y oportunidadnan ta menos, pero e forsa di creatividad y e forma innovador di ciudadanonan di nos pais, lo ta nos yabi pa exito,” nan ta bisa den e documento, expresando tambe cu “vision, determinacion y curashi di henter comunidad” por hiba Aruba na un economia mas fuerte y resiliente, y un autonomia mas fuerte.”

Ta trata di un documento extenso cu merece un tratamento mas detaya, di manera cu nos lo publica den e proximo dianan un resumen di cada ministerio. Den e articulo aki esun di Ministerio di Asunto General.

Ministerio di Asunto General

Ministerio di Asunto General, Innovacion, Organisacion di Gobierno, Infrastructura, y Desaroyo Teritorial, e carteranan di Asunto General, Innovacion y Organisacion di Gobierno ta pone tareanan clave pa reforma y restructuracion den man di e promer mandatario, pa loke ta e aparato gubernamental mes, pero e ministerio lo tin un papel importante tambe den dirigi e proceso gubernamental den su totalidad, unda e Master Plan “Reposicionando e Rumbo di Nos Pais” elabora aña pasa, y e acuerdo firma cu Hulanda, concretisa den e ‘Landspakket’, lo duna orientacion pa un desaroyo economico mas resiliente.

Dentro di e Masterplan ta distingui tres pilar (tema) principal cu ta: Reforza e capacidadnan institucional y di gobierno; administracion eficiente, productivo y responsable encuanto medio ambiente; y stimula un sociedad di enseñanza adapta y modelonan di empresa innovativo.

E cinco proyectonan prioritario, identifica pa logra aceleracion di e plan ta:

Mercado laboral reforma y modernisacion di Leynan Laboral;

Eliminacion di Red-Tape y improvisa eficiencia den procesonan;

Belasting: reforma sistematicamente;

E-Government, introduci e ID Digital Nacional y un plataforma digital confiable pa comparti data;

Mehora y fortalece capacidad legislativo y innovacion den manera di regula.

E ultimo punto menciona aki tin importancia grandi pa e ministerio aki, cu pa logra esaki ta bisa tambe cu mester fortifica posicion di e colegionan halto di estado, pa nan por cumpli cu nan tarea. Tambe tin plan pa realiza e cambionan legislativo pa institui e Ombudsman y tambe e legislacion necesario pa logra restructura economia y [a por logra diversificacion economico. Tambe lo tin atencion pa, banda di mehora capacidad legislativo, tambe reforza mantencion di estado di derecho, segun un ‘roadmap’ di priorisacion di modernisacion di leynan pa haya un aparato gubernamental mas efectivo y sistema administrativo mas simple. Pa esaki tin e plan yama “Uitvoeringsplan: Verbetering van de capaciteit en Doorlooptijd van wetgeving”.

Innovacion

Gobierno ta considera e tema aki di tal indole, cu a dicidi cu ta bin un departamento nobo, esta ‘Directie voor Innovatie’ (DvI), cu lo coordina innovacion pa gobierno “na un manera consistente, structura y centralisa”. E departamento nobo lo tin como tarea tambe ehecuta maneho di gobierno encuanto ‘E-government’ expresa den e E-Government Road Map 2020 – 2025 “A Better Citizen Experience”, cu e.o introduccion di un number personal unico di identificacion (Digital ID) y tambe inversion den infrastructura di IT di gobierno (hardware y software). Esaki acompaña pa proteccion di dato personal y seguridad cibernetica, y mas eficiencia den servicio di gobierno y eliminacion di red-tape. E refuerzo di e capacidad di gobernacion lo mester hiba na un sector publico mas agil, confiable y cu ta duna servicio di valor agrega na comunidad. Esaki ta implica tambe “sigura integridad y transparencia den tur e procesonan gubernamental,” segun e texto di e plan.

Tambe lo efectua un “quick-scan pa indentifica areanan di oportunidad pa mehoracion di servicio publico, y revisa cual servicionan ta principal pa un bon funcionamento di gobierno y cual lo tin cu evalua pa merge, descontinua of outsource (organisatie doorlichting).” Esaki lo mester conduci na introduccion di un modelo di sector publico cu ta “performance based” (basa riba prestacion; red.) y lo desaroya maneho di ‘change-management’ cu ta enfoca riba aumenta productividad y maneho efectivo di recurso humano.

Infrastructura y Desaroyo Teritorial

Ministerio di Asunto General pa promer biaha ta inclui e cartera di Infrastructura y Desaroyo Teritorial desde e promer momento, y cu esaki ta responsable di desaroyo di infrastructura, maneho di tereno y desaroyo teritorial sostenible. Segun e plan e metanan principal ta: “administracion eficiente, productivo, desaroyo responsable pa cu medio ambiente, y un transicion nacional sistematicamente pa un modelo circular cu ta pagable y realisable.” Den esaki lo ta obhetivo pa elimina atrasonan di procesamento di peticion pa tereno, y diferente permiso relaciona. Den esey mester hiba un maneho cu ta cuadra cu ley ROP, y stipulacionnan di ROPV, y impone cumplimento cu leynan y maneho di construccion. Tambe lo busca hunto cu Ministerio di Naturalesa un “solucion structural pa e problema di RWZI”. Tambe desaroya maneho pa stimula construccion eficiente den uso di energia, adaptacion na clima, y adherencia na regulacionnan ambiental (‘build with nature’). Lo optimalisa uso di tereno y espacio limita y lo aporta na maneho nacional di cambio di clima y resiliencia (climate change & climate resilience), segun e plan di gobernacion.

Te aki e relato pa loke ta Ministerio di Asunto General. Lo ofrece un resumen di cada ministerio den relato separa den e proximo dianan.