Programa Aruba Solidario lo enfoca riba varios topico social

Diamars ultimo, Cede Aruba a ofrece un conferencia di prensa pa informa tocante e di dos edicion di nan proyecto, denomina ‘Aruba Solidario’.

Esaki a cuminsa desde luna di maart pa april e aña aki, den conexion cu e pandemia. Ta trata un programa di television di conscientisacion den tempo di Covid-19, cu varios topico mirando cu hopi hende na Aruba mester ahusta nan estilo di bida.

Asina Daniel Tecklenborg a expresa cu nan a dicidi di hiba e programa Aruba Solidario riba rednan pa tur hende por haci pregunta y por participa durante e programa. E idea ta pa enfoca e programanan riba topiconan social, por ehemplo: ayudo financiero, tecnologia pa hende grandi of con por lanta un negoshi na e momentonan aki.

Ademas, Elsa Krosendijk a menciona cu na e momentonan aki ta existi hende cu ta biba cu algun problema, entre otro cu miedo. Specialmente hende grandi cu ta den cas di cuido, cu no ta hayando bishita di nan famia pa via di e pandemia.

Covid-19 a plama na casi henter e isla asina lihe, cu muchanan tin cu keda cas tambe. Y hopi di nan lo kier sa kico mas pa haci den nan tempo liber. Den e cuatro luna cu a pasa, nan a haci un training di actividad y mester reinventa cada biaha. Esaki tambe por conta pa personanan cu tin nan mesun negoshi y cu tambe tin cu ‘reinventa’; pero segun Krosendijk ta kere, e parti primordial ta pa cada un di e personanan sigui cuida nan mes mas, ta mas consciente di e responsabilidad pa un y tur cu ta su alrededor.

E importancia ta cu e biaha aki, compara cu e temporada pasa di e programa di television aki, tin e oportunidad pa comunidad por participa cu preguntanan pa expertonan y specialistanan, cu na e momento ey ta bay t’ey pa duna un contesta.

Tambe lo tin presente diferente hobennan cu ta bay yuda y guia e programa aki, cada un di nan cu su experticio pa presenta e topiconan manera nan lo presenta y lo trece dilanti desde dialuna awor, 21 di september. E programa lo sali tur diamars y diahuebs y lo caba na luna di januari.

Nurianne Arias Helder, cu ta forma parti di ekipo di guia di programa Aruba Solidario, a bisa cu e ta participa y contribui pa diferente proyectonan social. No solamente den salud pero tambe den otro areanan en general. El a gradua como docente na Universidad di Aruba y el a expresa cu na su trabou tin biaha cu e ta confronta cu cierto situacion social cu tin den comunidad. “Pa mi lo mas importante ta cu e informacion ta yega na esun cu tin mester di dje y di un manera adecua”, Helder a sigura.

Aysette Rivera, cu tambe ta den programa Aruba Solidario, a comenta cu ta importante pa trece e fundacionnan local di Aruba mas cerca di comunidad. Manera el a duna di conoce, tin hopi hende cu mester haya oido. Y cu e programa nan lo kier yuda comunidad cu informacion cu tin mester.