Programa anti-cheating no a discrimina contra studiante di color scur

(NLTimes) – Un studiante di Vrije Universiteit (VU) na Amsterdam no tabata victima di discriminacion di e programa anti-cheating usa pa e universidad durante examen a causa di su color di cuero.

E studiante a entrega un keho acusando cu e programa Proctorio tabatin dificultad pa detecta su persona a causa di su color di cuero. Sinembargo, Netherlands Institute for Human Rights a rechasa su acusacion den un declaracion diamars.

Durante e crisis di coronavirus, tabata realisa examen na VU di manera online. Pa preveni fraude, e studiantenan mester a instala un programa riba nan computer. Prome cu nan ricibi acceso na e preguntanan di e examen, nan mester a pasa door di varios evaluacion y control, incluyendo uno cu ta haci uso di camara. Parti di e programa su rol tabata pa reconoce e candidato su cara.

E studiante en cuestion, Robin Pocornie a entrega keho acusando cu e programa usa pa un examen no a reconoce inicialmente a causa di e color di su cuero ora el a purba di ricibi acceso y completa su examen. Tabata solamente ora cu el a pone luz adicional riba su cara cu e sistema finalmente a reconoce su persona. Segun e veredicto di e instituto, VU a demostra cu Pocornie no a experiencia mas problema compara cu otro studiantenan. Den e caso unda cu si el a encontra problema, e instituto a nombra su conexion instabil na internet of e hecho cu e tabatin bril bisti como motibo pa esaki.

E instituto si a critica e manera den cual VU a lidia cu e studiante su keho. E universidad su ombudsman pa studiantenan no kier a atende su keho. Den e tipo di caso aki, nan mester a dirigi su persona na e autoridad apropia. Como resultado, “Pocornie mester a cana caminda sumamente largo y trece su keho dilanti varios compania” prome cu VU a revisa su caso.

E instituto su decision ta aplica solamente na e caso di Pocornie. Esaki no ta implica cu e programa no ta discrimina nunca. Segun e instituto, “e ta completamente posibel cu e uso di Proctorio of cualkier programa similar di AI por berdaderamente causa discriminacion den un situacion diferente.”