Profesor Leaonard Besselink ta critica Hulanda pa blokia influencia indirecto di paisnan Caribense den e defensa di Reino

Recientemente profesor emeritus di Derecho Constitucional na Universidad di Amsterdam y docente na Universidad Internacional di Roma Leonard Besselink a publica un critica contra fuerte contra Hulanda relaciona cu e tema di deficit democratico den Caribe Hulandes titula: “Con bo kiermen deficit democratico? E paisnan den Caribe aparentemente no mester mishi cu legislacion financiero den asuntonan di Reino.”

Profesor Besselink ta menciona cu siman pasa, Statuut pa Reino Hulandes, cu ta conecta Hulanda y tres pais Caribense, a celebra su di 70 aniversario. El a indica cu tabatin basta atencion pa cu esaki, y hopi a menciona e ‘deficit democratico’ cu e paisnan Caribense tin cu soporta ainda a consecuencia di e Statuut ey.

El a señala cu asina mes Tweede Kamer a pasa un proyecto di ley cu eroneamente no a ser permiti pa ta un ley nacional, pa e simpel motibo cu e no kier pa e islanan Caribense eherce influencia, ni sikiera di e forma mas indirecto, riba, den e caso aki, e derecho presupuestario di parlamento Hulandes. Si a usa un ley nacional, e participacion di e regionnan di Caribe lo a keda miho salvaguardia.

El a splica den su observacion cu aparentemente no tin un presupuesto pa Reino, tin solamente leynan di presupuesto estableci autonomo door di Hulanda, tambe pa loke ta trata financiamento di asuntonan di Reino den sentido di e Carta pa Reino, manera defensa y asuntonan exterior

El a sigui splica cu Conseho di Estado no solamente ta kere cu esaki mester keda asina, pero cu e exclusion mester bay considerablemente mas leu den sentido cu cualkier legislacion financiero cu ta afecta un presupuesto asina – pues en todo caso tur legislacion riba finanzas publico – mester keda proteha, liber di cualkier posibel influencia di e paisnan Caribense.

Tweede Kamer, segun el a indica, tambe ta kere esaki, despues cu e iniciadornan a ser persuadi pa cambia di opinion door di Conseho di Estado, a base di argumentonan infunda y awor ta keda na Senado pa salvaguardia su rol como wardado di e constitucion Hulandes, den e caso aki e Statuut.

Profesor Besselink ta splica cu e posicion cu e paisnan Caribense no mester mishi cu legislacion financiero pa ehecucion di asuntonan di Reino ta bisto for di e consehonan di Conseho di Estado di Reino aña pasa riba loke e tempo ey tabata yama e concepto di Ley di Reino riba Obligacionnan di Defensa Financiero.

E proposicion di iniciativa aki esencialmente ta stipula cu ‘gasto di defensa, di acuerdo cu acuerdonan haci dentro di e Noord-Atlantische Verdragsorganisatie (NAVO), ta suma na e ekivalente di por lo menos 2% di e producto interno bruto di di Hulanda’.

Profesor Besselink ta sigui splica cu e rasonamento cu ta sigui ta perpetua e exclusion di e parlamentonan di e paisnan Caribense di Reino for di financiamento di tareanan di Reino cu tambe ta regarda e paisnan aki, pues den e sentido ordinario di palabra nan ta regarda henter Reino; hasta si, bou di e Statuut, e paisnan ey por ser obliga pa contribui na financiamento di e tareanan ey,

En corto, el a indica, e Carta ta stipula cu si un ley ta regarda un asunto di Reino manera defensa y ta ‘aplica’ pa un pais Caribense, e mester tuma e forma di un Ley di Reino. Ademas e minister plenipotenciario di un pais Caribense ta participa den e reunion di Conseho di Minister si un asunto di defensa ta regarda defensa di e teritorio di e paisnan Caribense y tambe ta ‘afecta’ e pais concerni, cual un pais mes ta determina.

E profesor ta cuestiona cu legislacion financiero cu ta stipula cu gastonan di defensa mester suma na por lo menos 2% di GDP ta ‘aplica’ den e paisnan Caribense. El a resalta cu e concepto di ‘aplicabel’ ta parce di ta un concepto dificil den e contexto aki, pasobra hende tin e tendencia di pensa cu ciudadanonan ta mara, mientras cu un ley manera esaki ta dirigi solamente na gobierno.

Sinembargo, el a agrega, for di su punto di bista, solamente den un contexto den cual actividad gubernamental no necesariamente ta na beneficio di e ciudadano – loke no mester ta e caso den un democracia – por tin un diferencia cualitativo den e contexto aki entre legislacion cu ta obligatorio pa ciudadanonan y legislacion cu ta obligatorio pa gobierno.

El a señala cu e norma cu gasto di gobierno riba e asunto di Reino aki mester suma na cierto suma cu ta regarda gasto haci door di e minister, den e caso aki e minister di Defensa, sinembargo, e minister di Defensa esencialmente semper ta un organo di Reino.

Profesor Besselink ta splica cu e Conseho di Estado ta bisa cu e ley no mag di ta un ley nacional. E rasonamento pa esaki, el a subraya, ta mesun cortico cu e ta debil. El a indica cu e Conseho ta opone, “cu door di forma e proposicion presente como un proposicion pa un Ley di Reino, e paisnan Aruba, Curaçao y Sint Maarten lo haya influencia riba legislacion presupuestario Hulandes. Al fin y al cabo, nan ta envolvi formalmente den creacion di leynan nacional y nan amiendanan. Door cu un ley nacional no por wordo cambia door di ley comun, Parlamento Hulandes no por eherce su derechonan presupuestario. Como tal, contrario na loke e memorandum di splicacion ta bisa, esaki ta constitui un infraccion di e derecho presupuestario constitucionalmente hancra di Parlamento Hulandes.”

El a enfatisa cu e rasonamento ta perde su marca. El a splica cu aunke e Ley di Obligacionnan di Defensa Financiero ta concerni e presupuesto, e no ta un ley di presupuesto den e sentido di e Constitucion. El a sigui splica, cu esencialmente e ley ta mescos cu cualkier otro ley cu por tin of ta destina pa tin implicacionnan presupuestario. E hecho cu Parlamento Hulandes no por eherce su derechonan presupuestario como resultado di un ley asina, pa e motibo cu representantenan democratico cu no ta den parlamento mes por eherce influencia riba dje, ta mesun absurdo cu bisa cu un tratado cu ta crea obligacionnan financiero ta conduci na cu parlamento no por eherce su derechonan presupuestario.

“Si Conseho di Estado tabatin rason, Hulanda lo mester a retira for di Union Europeo pasobra esey lo ta den conflicto cu e derechonan presupuestario di parlamento Hulandes, of por lo menos nos lo mester a bandona e union economico y monetario y consecuentemente e Eurozone,” e profesor a remarca.

El a resalta cu e influencia cu e paisnan den Caribe lo tin riba e legislacion presupuestario si e tabata un Ley di Reino riba Obligacionnan di Defensa Financiero ta dificilmente mas y, riba balansa, menos cu e influencia cu otro partidonan y e institutonan di UE tin riba ley presupuestario.

El a indica cu e influencia democratico di Caribe riba legislacion nacional ta notoriamente debil. El a señala cu parlamentonan nacional por haci nan posicion conoci y, si ta necesario, por papia den Tweede Kamer of den Senado, pero no por participa na e votacion. Si e minister autorisa of representantenan di un pais Caribense presente den Tweede Kamer indica cu nan ta contra di un ley di Reino proponi, adopcion ta rekeri un mayoria di tres quinto parti di e votonan. Si e mayoria den e voto ta menos cu tres quinto parti, e consulta den Conseho di Minister lo continua.

El a sigui splica cu e minister autorisa tambe por participa na e deliberacionnan den Conseho di Minister y haci su posicion conoci, por ehempel ora ta trata presupuesto y un pais Caribense ta kere cu e ta ser afecta, pero e minister plenipotenciario semper por wordo anula den Conseho di Minister.

El a indica cu si sigui e procedura di articulo 12 di Statuut, e ora ministernan plenipotenciario en berdad por enforsa consulta continuo den gruponan mas chikito, pero e practica di e asina yama ‘asunto di aros y sucu’ y su consecuencianan ta prueba cu Hulanda ta haciendo uso di su superioridad , hasta si un decision bay contra di interesnan Caribense y e paisnan ta kere cu nan ta seriamente den desbentaha.

Profesor Besselink ta enfatisa cu e legislacion riba obligacionnan di defensa financiero no ta concerni un ley di presupuesto. El a splica cu si e ta den e forma di un Ley di Reino, manera e iniciadornan tabatin intencion originalmente, e por a ser cambia solamente pa ley nacional, manera e Conseho di Estado ta señala. Sinembargo, el a agrega, como cu e amienda aki no ta un amienda di un ley di presupuesto, no por t’asina cu Parlamento no por eherce su derechonan presupuestario. El a resalta cu na final modificando un ley nacional cu no ta un ley di presupuesto, unda cu un pais Caribense por tarda e adopcion pa un periodo cortico pero no por preveni esaki, dificilmente por frustra e derecho presupuestario.