(NLTimes) – Jelle Zuidema, profesor di e materia pa procesa lenguahe natural ta cpreocupa cu e peligernan potencial cu ChatGPT ta posee.
Por ehempel, e asina yama ‘chatbot’ ta por produci mensahenan dañino of ser mal usa pa propositonan di promocion. Tambe, por neglisha otro ciencia pa causa di e beneficionan comercial di ChatGPT. Pa preveni esaki, segun Zuidema mester bin cu reglanan Europeo.
ChatGPT, desaroya pa e compania OpenAI, por genera textonan basa riba Inteligencia Artificial (AI). E programa por ser usa den sistemanan di buskeda online pero tambe por keda integra den weganan y como un ayudante digital pa huiswerk. Si no haci esaki di e manera corecto, e ‘chatbot’ por ta “peligroso” segun loke Zuidema a expresa, pa motibo cu e ‘chatbot’ por accidentalmente pero tambe intencionalmente crea declaracionnan racista of sexista. “Esaki ta loke bo kier preveni. Un studiante den depression por ehempel, no kier un combersacion toxico,” e profesor a splica.
Segun Zuidema, e desaroyo pa testnan di siguridad no mester ta den man di companianan. Hopi biaha nan no tin e capacidad pa revisa tur e data nan mes. Tambe, por genera placa di promocionnan, cual por causa cu e ‘chabot’ nan aki lo cuminsa busca contenido paga.
Sin regulacion, no ta cla cua tipo di declaracionnan ni mal informacion ChatGPT ta plamando y ki metanan comercial e ta persiguiendo, segun e profesor. Pa motibo aki, mester tin reguladornan y claridad tocante e data usa pa train e ‘chatbot’. “Companianan no ta tumando e responsabilidad nan mes,” Zuidema a declara. Tambe e ta kere cu e mescla di negoshi y ciencia ta un “desaroyo preocupante.” Companianan buscando ganashi ta dunando empleo na cientificonan y nan ta lagando topiconan cu “comercialmente ta menos interesante” cu demasiado tiki investigacion. “Por ehempel, tin hopi investigacion riba con tecnologianan di lenguahe por ser usa pa revisa textonan legal, biomedico of financiero, pero tin demasiado tiki riba aplicacionnan pa e ciudadanonan ordinario of NGO.”
Den desaroyonan recien pa cu e accionnan tuma of no tuma contra ChatGPT, diabierna siman pasa Italia a pone un prohibicion provisional pa motibo cu aparentemente ChatGPT no ta cumpli cu OpenAI su reglanan di coleccion di data personal. Anteriormente, tambe a revela cu e gobiernonan pronto posiblemente lo por stop desaroyo di Inteligencia Artificial via un acuerdo internacional. Mas o menos 1,400 persona di e mundo di tecnologia tambe a haci yamado pa pone un pausa riba e desaroyo di Inteligencia Artificial.
