Vice Consul di Gestion Comercial y Negoshi di Consulado di Republica Dominicana na Aruba, Edward McCollum a presenta un balans positivo di e bishita di un delegacion di e sector comercial di Aruba den e Feria Agro-Alimentaria 2017 cu a tuma luga na Sto. Domingo durante dia 17 te cu 21 di mayo ultimo. “E tabata un exito pa tur esunnan cu a participa. E tabata un feria magnifico y bon organisa.”
Di su banda, Consul Dominicano na Aruba, Alfredo Zabala a reconoce e trabou cu sr. McCollum a haci den nomber di e mision diplomatico aki. “Ta e prome biaha cu Aruba ta participa cu un cantidad importante di empresarionan den e feria aki.”
Igualmente el a laga sa cu pronto lo duna dinamismo na e Memorandum di Entendimento (MoU) cu a keda firma luna di september ultimo entre su pais y paisnan di Reino Hulandes. El a laga sa cu e MoU aki cu ta involucra Aruba tambe ta den desaroyo. E ta spera cu pronto lo por duna mas detaye rond di e MoU aki ya cu nan ta na spera di mas informacion di nan Ministerio di Relacion Exterior.
Feria
E feria a produci un suma di 30 miyon dollar a base di benta cu a sosode durante tres dia. Igualmente ta wordo papia di un suma di mas cu 250 miyon dollar cu lo genera e apertura di negoshinan a base di contract di exportacion mayoria di nan pa Europa y Canada. El a informa cu China y Hapon tabatin un presencia grandi den e feria aki, ya cu nan ta interesa den productonan agricola Dominicano, specialmente awacati, mango y anasa.
Mision comercial di Aruba
Mas cu 164 comerciante rond mundo a atende e conferencia aki; y un mision comercial di Aruba tambe a bay pa explora e posibilidad di cera negoshi na Rep. Dominicana. Sr. McCollum a declara cu varios empresa local di e sector di fruta, berdura y productonan alimenticio cu no ta daña lihe entre nan juice y base pa traha juice a bay cu sosten di e Consulado Dominicano na Aruba cu a facilita tur cos. Te hasta tabatin empresa incluso cu a bay riba su mes y alrededor di 5 empresa comercial di Aruba a bay e feria aki.
No tin un cifra exacto di e negoshi cu e empresanan local a haci na Rep. Dominicana; pero nan a realisa compras di mas cu un container locual segun sr. McCollum ta un iniciativa positivo pa un mercado chikito di parto di empresanan cu kier apoya e productonan Dominicano. Nan a haci hopi lobby y enlace comercial y nan a intercambia informacion riba nan empresanan. E ta reconoce cu esaki ta e trabou basico cu e consulado Dominicano a realisa enconexion cu e feria aki.
Durante nan participacion nan a palabra negoshinan cu otro sorto di productonan Dominicano ya procesa cu lo competi den e mercado local denter di dos luna. Tambe tin productonan Dominicano ya disponibel riba e mercado local cu lo fortalece nan posicion.
Sr. McCollum a laga sa cu e consulado Dominicano lo sigui di cerca e negoshinan cu a bay e feria pa sigui duna nan sosten pa fortalece e relacion comercial aki. “Nan a keda sorprendi riba e desaroyo y calidad industrial di Republica Dominicana riba elaboracion di productonan; y e presentacion di nan productonan”, segun sr. Mc Collum. Esaki a yuda pa crea un cantidad di lasonan comercial.
Evento na Aruba
E feria aki ta tuma luga anualmente y cada aña e participacion di empresa interesa pa haci negoshi cu Republica Dominicana ta creciendo. Nan ta spera cu e interes di mas empresa di Aruba lo sigui crece pa nan conoce di cerca e productonan Dominicano.
Consulado Dominicano via social media a formula un invitacion pa empresanan Dominicano interesa pa extende nan mercado na Aruba lo por a presenta un muestra di nan productonan pa exhibi nan na Aruba. Ya caba den e sede diplomatico aki tin un muestra limita di diferente producto entre nan siga, producto cosmetico of di beyesa, T-shirt, uniform, piedra y vloer decorativo, producto di limpiesa, chuculati, etc.. Nan ta interesa pa empresanan local por comercialisa nan marcanan; y eventualmente lo organisa un evento na Aruba.
