Ayera mainta, durante un conferencia di prensa cu minister di Salubridad y Deporte Dangui Oduber a ofrece, el a trece dilanti e topico di legalisacion di cannabis medicinal y e procedura cu lo mester tuma na e momento di e importacion di e productonan cu ta contene e substancia aki.
Oduber a informa cu siman pasa, Gobierno a tuma e decision di legalisa e uzo di cannabis medicinal, cu entrante aña 2020 esaki lo drenta na vigor. Mediante un decreto ministerial nan a decreta e productonan cu ta contene CBD Cannabidiol como un remedi, tur e productonan cu ta azeta, crema, capsula y pildonan cu ta contene esaki y un dosis hopi abou di THC, esakinan lo ta poni disponibel pa comunidad. Productonan di CBD cu ta contene un dosis hopi mas halto di THC lo tin cu yega na un receta di e dokter di cas y hende tin cu busca na botica manera cu esaki ta regla mundialmente.
E ora ey, Gobierno lo mester bay over pa publica e decreto ministerial unabes nan ricibi esey y e momento ey, su maneho lo wordo anuncia. Igualmente el a destaca cu nan mester duna un importvergunning pa por importa e productonan aki y tur di nan cu a wordo decreta como remedi lo mester cana e mesun procedura cu cualkier otro remedi cu ta wordo importa y registra na Inspectie Volksgezondheid Aruba (IVA) pa controla. Muestranan mester wordo entrega y despues cu esey ta haya aprobacion di IVA oficialmente por importa e productonan.
