Minister di Turismo, Salud Publico y Deporte Dangui Oduber (MEP) ayera atardi a anuncia cu den 2020 cannabis medicinal den forma di productonan importa lo bira legal. Esaki ta pa productonan cu a pasa evaluacionnan na Merca, Hulanda y Canada, cual lo ta disponibel ‘over-the-counter’ na botica y si e tin contenido halto di THC (Tetrahydrocannabinol), lo mester pidi receta pe.
E mandatario di salud a anuncia na TeleAruba cu actualmente e procedura pa firma tur e documentonan a keda cla, pa asina departamento huridico DWJZ por traha e decreto ministerial cu lo declara productonan conteniendo Cannabidiol (CBD) y THC como legal pa bende na hipotecaria. E productonan aki ta inclui azeta, pildo y crema.
Oduber a subraya cu tin hopi ‘bruhamento di tera’ ora ta trata di e legalisacion di cannabis medicinal, cual ta den acuerdo di gobernacion, particularmente di parti di oposicion (AVP) y sindicatonan policial y di enseñansa.
Permiso pa importa producto di cannabis.
T’asina cu gobierno lo bay otorga permisonan na partidonan interesa den importa productonan cu ta contene CBD y THC, cu condicionnan estricto mara na e permiso, cual lo exigi cu e productonan aki a pasa inspeccion no solamente sea na paisnan manera Europa, Merca of Canada (paisnan cu ta regula e productonan caba), pero tambe na Inspectie Volksgezondheid (IVA). Companianan cu ya caba ta bende medicina lo por bin na remarke pa pidi permiso, pero tambe otro compania cu kier cuminsa bende e substancia aki lo por haci peticionnan unabes cu e ta legal, segun e minister.
Evaluando legalisacion di cultivo.
Esaki no lo kiermen cu lo ta posibel pa produci cannabis localmente pa sea uzo local of exportacion. Gobierno ainda ta evaluando riba e aspecto aki. Minister di salud publico a declara cu aworaki tin hende ta uzando cannabis den su forma medicinal, pero ilegalmente, pa trata varios malesa. “E meta pa esaki tabata haci e acceso mas facil pa yuda esnan den necesidad pa por mehora nan salud”.
Na aeropuerto lo haci control pa cantidad di cannabis medicinal.
E mandatario a reacciona tambe riba e ‘varios’ caso cu a bin dilanti ultimo añanan unda personanan cu ta cumpra productonan di cannabis medicinal, por ehempel na Hulanda, unda Kruidvat ta bende esaki y ta disponibel libremente, ta trece esaki bek Aruba y ta haya discusionnan cu duanero. Ora cu esaki bira legal, minister a indica cu lo haci un control riba e cantidad. “Esaki no lo nifica cu unabes cu esaki bira legal cualkier persona por trece un maleta yen di e productonan. Pero si lo ta posibel pa trece dosisnan personal, mescos ta tolera biaha cu cierto cantidad di medicamento, alcohol y sigaria”.
