NG Joel Woods (1).jpg

Joel Woods ta un mescla di Surinam y America pero el a crece na Aruba y ta considera su mes un Island boy. E hoben ta studiando Media y Comunicacion na Hogeshool Utrecht y den e entrevista aki ta comparti cu Bon Dia Aruba un poco di su plannan.

 

Woods ta considera su mes un productor. Recientemente e tabata na Aruba pa filma algun proyecto pa artistanan Hulandes manera Childsplay y Chuckie.
“Graba na Aruba tabata un reto pasobra Aruba simplemente no ta conta cu tur e aparatonan cu nos tabata mester. E no ta un destinacion conoci den mundo di pelicula.
Pues mester a manda busca esakinan di Hulanda y locual nos no por a trece nos mester a improvisa. Uza naturalesa manera un prop. E tabata 3 dia yena cu stress pero e producto final tabata bal la pena”. E hoben ta subraya. Te cu awo el a yuda produci dos video musical y un pelicula cortico den colaboracion cu artistanan Hulandes.

 

Cuminsamento

Aunke cu awor Woods tin su meta enfoca riba mundo di media visual, no ta akinan su interes den entrenamento a cuminsa e tin un storia largo di ta hinca den un radio station. E ta conta: “Pensando bek con mi a cuminsa, e tabata rond di e tempo cu mi amigo Jean Carlos tabata traha na Cool FM y mi tabata bay e radio stacion tur dia. Eventualmente mi a join Excite Music como un DJ y mi tabata toca na diferente fiesta local. Pa un tempo hopi cortico mi tabata tin mi propio programa na Cool FM tambe. Asina mi a cuminsa crece. Pues den e transcurso di toca den club mi a conoce Mario Gonsalves kende ta un artista visual, mi a tende cu e tabata bon den traha poster y edit. Mi a haya un interes hopi grandi den locual e tabata haci. Den mi tempo liber mi tabata bay su cas y wak con e tabata traha cu photoshop y cosnan asina. Pa medio di dje mi a conoce e mundo ey di media visual”.

 

Hunto e dos hobennan a uni cabes y a bin cu e videonan di prank y chasconan cual popularidad a crece riba internet titula “The Boogie Man Show”. Hunto nan a crea contenido pa algun tempo. “Despues nos tur cu tabata contribui na The Boogie Man Show, a cuminsa crece mentalmente. Nos a tuma e decision di expande y keda bay dilanti. Cuestiona con nos por crece hunto como un team. Nos a bin Hulanda y a cuminsa traha hunto como un team na Hulanda. Mi por bisa cu tur locual nos a produci te cu awo tabata un exito. Pa esey tambe mi ta studiando Media y Comunicacion pa mi por expande mi sabiduria tocante e mundo di media, siña con pa conta un storia mas miho, con pa traha un film mas miho y network tambe”.

 

Bin bek Aruba

Bon Dia Aruba a puntra Woods si e tin den plan bin bek Aruba y el a contesta.
“Claro cu mi lo kier bin biba Aruba bek, pero mirando e negoshi internacional y locual mi kier haci. Aruba simplemente no por ofrece locual e paisnan mas grandi por. E lo ta irealistico pa bisa cu mi lo bay biba bek eynan. Mi meta mas grandi ta pa traha comercialnan pa companianan grandi. Pero mi lo kier bin Aruba pa duna tayer na hobennan cu ta interesa den produci proyectonan visual”.

 

Aspirantenan na Aruba

Woods ta conta cu aunke na Aruba, talbes ainda no tin tur e recursonan y educacion necesario pa hobennan cu ta motiva pa sigui den e mundo di media visual. Esey no ta motibo pa no bay pe. “Si bo ta interesa den e mundo aki djis bay pe. Subi internet y busca tur bo informacion. Wak tutorial riba Youtube, tin hopi hende eyfo cu ta splica stap pa stap con bo por cuminsa, cual ta e reglanan ora di graba, kico bo tin cu tuma en cuenta. Bo no mester di un camara caro pa bo cuminsa. Keda cu bo drive si bo ta sinti e ta bo pasion, no laga niun hende kibra esaki. Sali di Aruba y expande bo conocemento. Conoce mas hende cu e mesun pasion
Paso di berdad, tin hende rond di mi cu ta comparti e vision ta locual ta pusha ami pa sigui bay dilanti. Sigui purba, te ora bo obtene e resultado cu bo kier” Woods ta enfatisa.