Durante un conferencia di prensa ayera tardi e hoben artista Jorzinho Schlipken Croes conhuntamente cu Departamento di Cultura Aruba (DCA) a lansa oficialmente e videoclip musical di e cantica “Ban Cende un Bela”.

E produccion musical nobo aki ta un tema estilo gospel den e ritmo di wals cu tin un mensahe di speransa pa henter comunidad. Jorzinho, interprete di e cancion aki, ta un hoben cu un trayectoria amplio den musica y ta e ganador tambe di e proyecto Poder pa Hubentud 2021 den categoria 13 pa 17 aña di edad.

For di chikito el a participa den festivalnan cultural manera Dande y Un Canto pa Aruba su Himno y Bandera. Como mucha den temporada di Pasco, el a lansa diferente tema di Pasco y for di su di 10 aña e ta forma parti di Tipico Hoben y Talentoso pasando cu Dande di cas pa cas.

Jorzinho mes a conta cu di chikito e tabata canta den e coro di misa di Paradera y for di eynan el a crece y a conoce mas di cantamento y for di e tempo ey e semper tabatin e idea pa interpreta un cantica gospel pa hiba un bunita mensahe pa comunidad.

Su produccion nobo ta un composicion di John Freddy Montoya y un areglo di Raul Piar. Jorzinho a splica cu for di momento cu nan a scucha e mensahe di inspiracion, nan no tabata kier pa e cantica bay perdi. “E tin un mensahe asina impactante cu mi ta kere den e mundo moderno e merece di ta ariba un videoclip”, el a expresa.

 

Actualmente Jorzinho ta formando parti di un banda di hobenan talentoso como drummer y conhuntamente cu e hobennan aki, nan ta creando nan propio temanan enfoca ariba musica jazz, soul y funk. E ta practica percussion (conga) tambe den un conhunto cu enfoke Latino Caribense.

Jorzinho su pasion ta musica y su interes pa diferente genero ta bira mas amplio. El a remarca cu tin diferente proyecto ainda na caminda, pero “Ban Cende un Bela” ta djis e prome stap di mas produccion cu el lo lansa pa pueblo.

Sr. Robert Maduro tabata presenta durante e conferencia di prensa den representacion di Departamento di Cultura y Maduro a indica cu DCA ta hopi satisfecho di forma parti di e proyecto aki como partner.

El a remarca cu DCA ta contento cu hobennan manera Jorzinho ta tuma e iniciativa di presenta canticanan cu ta sostene cultura. “Cultura ta algo bibo, cultura ta algo cu ta draai y cu ta keda biba den cada un di nos”, el a bisa. “Cada produccion cu nos haci sea ta den e ramo musical, sea ta den e ramo di tarima, den e ramo di baile of cualkier un di e disciplinanan di cultura pa nos ta importante pasobra cultura ta un desaroyo cu ta anda den pueblo y cu ta tene nos pueblo bibo y varia”.

Joanne Kelly, mama di Jorzinho Schlipke Croes y productor di e produccion aki a splica cu e trayecto y proceso pa realisa y presenta e proyecto aki no tabata facil. El a conta cu algun luna atras Jorzinho a trece e idea pa dilanti pa lansa su mes oficialmente como solista. “Jorzinho no ta pensa cu musica ta solamente entretenimento, pero musica tambe ta pa conscientisa sociedad y expresa e sentimento cu ta biba den dje”, el a bisa.

Kelly a sigui conta cu nan a traha incansablemente pa encontra e “perfect match” pa Jorzinho su prome produccion como solista. Kelly a splica cu nan a wordo acerca pa e compositor, John Freddy Montoya cu a traha un bunita composicion cu un mensahe cu Jorzinho tabata identifica su mes cune.

Despues di a wak e composicion, Kelly a remarca, nan no tabata kier pa e bunita trabao bay perdi y asina nan a dicidi di hinca mas ekiponan profesional den dje pa haci un produccion di nivel halto. Nan acerca e maestro Raul Piar pa aregla e cantica y asina a cuminsa pas’e na tur e radionan pa e mensahe di cantica yega na comunidad. Pero nan tabata kier bay mas leu cu e produccion musical aki.

“Mirando cu esey tabata e prome stap di e proyecto, nos a pensa cu nos kier pa e biba den cada un di e personanan den comunidad pa e mensahe por yega y ki miho forma cu den forma di un videoclip y asina e idea pa un videoclip a nace”, el a indica.

Kelly a subraya cu e preparacionnan pa cu esaki, pa realisa e videoclip, no tabata uno facil. El a splica cu pa hinca tur set up di tur e escenanan tabata hopi dificil y haya e personahenan corecto pa forma parti di e setting ey tambe tabatin su trabao desafiante. Nan a acerca Dani Cruz, un hoben Arubiano cu ta conoci pa su trabaonan cinematografico y di biaha el a bay di acuerdo pa uni y forma parti di e proyecto.

“E tempo tabata cortico, nos a pusha y tabatin hopi contratiempo, pero nos a haya bon cooperacion di tur persona envolvi. Nos tabatin un elenco estelar pa e videoclip cu hasta talentonan scondi a sali di esaki”, Kelly a agrega.