Guyana ta bisa cu e ta ‘on track’ pa alcansa un produccion record e aña aki, produciendo te cu september 475.202 ounce (1 ounce= 28,34 gram) di e metal precioso.
Ministerio di Recurso Natural a bisa den un declaracion cu entrada total di exportacion di oro a aumenta te na US$ 603,98 miyon compara cu US$575,87 miyon den e mesun periodo di nuebe luna di aña pasa.
Guyana a mina 713.000 ounce di oro aña pasa y e ministerio ta predeci cu e produccion na 2017 lo surpasa e cifra aki, basa riba e produccion te cu luna pasa y e produccion tipico di temporada di ultimo trimester di aña, unda tradicionalmente produccion ta aumenta.
Tambe, declaracionnan reciente di produccion aumenta di parti di Guyana Goldfields Inc ta reforsa e pensamento cu stabilidad economico y prijs di mercado mundial ta impulsa produccion mas halto, asina e ministerio a añadi.
Di e oro produci te cu september, mineronan chikito y mediano a produci 309.787 ounce, mientras cu e dos companianan minero grandi, Guyana Goldfields y Troy Resources, a produci 117.002 y 48.412 ounce, respectivamente.
“Nos ta continua cu implora tur minero pa declara nan oro na e Guyana Gold Board o na dealernan di oro licencia,” e ministerio di Recurso Natural a bisa. “Gobierno di Republica Cooperativo di Guyana ta comprometi pa traha cu mineronan pa sigura cu nan problemanan ta keda atendi, pasobra hunto nos ta traha pa surpasa e record di 2016 di 713.000 ounce.”
