Asesor multilateral di Asunto di Gabinete y presidente di comision nacional di Sustainable Development Goals SDG’s, Jocelyne Croes, a laga sa cu e SDG’s ta exigi responsabilisacion y sin data nan no por midi resultadonan.

El a destaca e importancia di uzo di data adecua y actualisa. Nan ta bira un instrumento vital pa e gobiernonan y institucionnan internacional, pero tambe pa e aparato publico y sector priva, caminda nan por haci nan trabou debidamente, y nan por bin cu decisionnan argumenta.

El a laga sa cu na Aruba e desafionan cu nan a yega di wak riba nos sistema di estadistica ta den un presentacion cu el a duna. Esaki a wordo haci cu ayudo di Peru y di e Comision Economico di America Latino y Caribe (CEPAL). Na 2017 Aruba a traha un plan pa pone den practica e Obhetivonan di Desaroyo Sostenibel ODS. Nos isla a bira un di e prome paisnan na mundo cu a obtene for di Nacionnan Uni un ‘route page’. Esaki a haci cu Aruba ta un di e prome pais cu a pone den practica e agenda di e ODS. Asina Aruba por a mira su desafionan pa logra un comunidad mas sostenibel cu nos tur ta desea. Un di e desafionan tin di haci cu e produccion di data cu no ta wordo comparti.

Ainda e datonan aki no ta wordo mira publicamente como algo cu por contribui na e maneho cu ta beneficia nos comunidad tambe. E ta haya cu esaki ta rekeri coordinacion, y esaki ta algo cu no ta existi hopi. Nos ta traha hunto, pero den tema substancial no ta comparti data, Pues e capacidad estadistico ta limita.

Tampoco tin un definicion comun pa describi e mesun problema. Por ehemplo no tin un definicion di ‘drop out’ of di un hende cu ta bandona e sistema di enseñansa. Igualmente riba pobresa no ta existi un definicion comun. Cosnan asina ta crea dificultad, ya cu dificilmente nan por midi nan, sino ta existi un definicion standard.

Dificilmente por bini cu politica di maneho si no ta compaña cu un midimento riba e impactonan cu esaki por causa den nos comunidad. Esaki debi cu nos no sa mucho cla e problema cu ta wordo analisa. Tambe estadistica riba genero pa midi cu niun hende keda atras, por ehempel e participacion di e hende muhe den e forsa laboral, tin su desafio. Pues Croes a defini esakinan no como problemanan sino como “un gran desafio.” Apesar cu tin programa cu ta establece e contacto pa mira cierto realidad, ta importante pa evalua si via estadistica realmente ta wordo confirma nos percepcion riba un cos. Asina ta establece un maneho y strategia cu berdaderamente por beneficia nos comunidad.

 

Tur esakinan ta nifica un enfoke di transformacion cu ta wordo rekeri pa traha den colaboracion cu otro. Croes a referi cu e ODS ta un forma pa haci cosnan di un manera diferente y traha di un manera diferente, y no un lista gewoon pa realisa. Cada pais por hinca e metanan of obhetivo den nan propio sistema pa bira mas eficiente y eficaz. E ta un forma pa logra loke ODS di Nacionnan Uni kier logra pa desaroya e diferente comunidad di manera sostenibel.