Abimael Guzman y otro diesun persona cu ta hefe di e grupo Sendero Luminoso a participa den un huicio contra nan, pa motibo di nan responsabilidad den e atentado riba e caya Tarata di Lima, caminda 25 hende a resulta morto na aña 1992. E suceso ey ta e crimen mas simbolico di tur crimen cu e organización criminal aki a comete na Peru.
Guzman di 82 aña ta cansa, y malo. El a sinta hunto su compañeronan, entre nan su casa Elena Yparraguirre, pa tende e huicio oral na Base Naval di Callao. Guzman ta cumpli un condena di bida largo riba acusacion di terorismo. Guzman ta un homber bieu, su cabey ta shinishi, cu un mal postura y tin biaha tabata parce cu e tabata drumi durante e huicio, segun e video di circuito cera di e huicio cu Poder Hudicial a duna. E imagen aki tabata algo hopi diferente den comparacion cu su postura di desafio, tempo cu el a ser deteni na 1992, despues di e atentando ey.
Miko Ruiz, procurador anti-terorismo ta solicita reparacion civil na fabor di estado di Peru pa un balor di 10 miyon sol (moneda di Peru) cu tur dirigente di e grupo terorista Sendero Luminoso mester paga. Procurador a bisa cu e solicitud di ‘prescripcion di delito’ (pordon di delito pa motibo cu e periodo di e delito a vence) no ta posibel, pasobra mester a pasa mas di 30 aña desde dia cu a comete e delito, y te na momento aki a pasa 25 aña solamente.
Procurador a descarta cu Abimael ta den estado grave di salud, e ta pensa cu ta un show di banda di Abimael pa asina purba di reduci su condena o bay den un hospital. Contrario na su pensamento e mal estado di salud di Abimael a obliga na suspende e huicio dia 14 di februari. Guzman a bisa dilanti di tribunal cu e tin mas di un luna malo y cu e grupo di dokter di Base Naval di Callao no a logra mehora su situacion.
