Aparato hudicial di Aruba lo conoce un Procurador General (PG) nobo. Asina minister di Husticia, Andin Bikker a informa ayera mainta sin bisa su nomber ainda, te ora cu e proceso di e nombramento aki ta oficial. Prensa local a bin cu algun nomber, pero e mandatario a abstene di confirm’e, tampoco el a desmenti.
E nombramento di e PG nobo cu dia 1 di september lo drenta den servicio, e mandatario a considera parti di e pasonan cu a wordo adopta pa implementa y reenforsa e ley contra abuso di menor cu a keda trata den parlamento diabierna ultimo. Tambe un Fiscal Mayor nobo a keda nombra cu tambe lo drenta den funcion dia 1 di september. Tur dos funcionario un di nan tareanan ta bay ta pa duna atencion ‘special y severo’ riba casonan di abuso di menor.
Otro paso cu ta purba di coregi loke a yega di ocasiona disgusto den comunidad ta cu den e ley aki no tin espacio pa distingui si un persona por bin na remarca pa wordo laga na libertad condicional. Nan ta cambio cu a wordo haci den codigo penal di 2014 pa fortalece e castigo contra e tipo di delito di violencia y abuso sexual contra menor cu tanto polemica ta bin causando den comunidad.
Tambe el a referi na e mocion cu a ser presenta den Parlamento, den cual lo introduci castigonan of strafnan mas severo cu Ministerio Publico (OM) por pidi pa atende e tipo di caso aki. Bon Dia Aruba a trece cerca e mandatario cu comunidad ta skeptico ya cu a pesar cu tin aumento di castigo, con efectivo esaki ta na momento cu ley ta wordo interpreta y castigo mester wordo duna. El a reacciona bisando cu nan ta premira cu tanto Fiscal Mayor y tambe PG nobo, lo atende severamente cu e tipo di delito aki.
E mandatario a laga sa cu su ministerio a tene un combersacion cu e personanan aki, caminda a wordo remarca cu e mester pone atencion specifico y severo na e tipo di delito aki. E ta spera cu ora ta wordo pidi straf e por ta mas halto. Tambe a base di e combersacion cu nan tin cu e magistradonan lo duna un indicacion na nan riba e sentimento y preocupacion legitimo cu ta existi den comunidad y cu a wordo expresa den diferente forma, entre nan graffiti y marchanan.
Igualmente e hecho cu a wordo aumenta pa 20 aña e castigo maximo, minister Bikker ta considera cu esaki ta un señal cu gobierno ta mustra e seriedad contra e tipo di crimen aki. “E ta un señal pa e magistradonan tambe cu nos comunidad ta haya e tipo di crimen aki inaceptabel,” el a declara.
