A base di entrevistanan cu minister di Infrastructura y e departamento DIP, Bon Dia Aruba ta conclui cu manda carta pa minister ta yuda den e proceso di haya tereno.

Ta conoci cu e lista di spera pa peticionnan di tereno di gobierno ta uno hopi largo. Actual tin 14.000 riba e lista. Un punto cu semper ta discuti ta e procedura pa haya tereno. E condicionnan ta conoci pero locual no ta transparente ta kico ta pasa momento cu a entrega e peticion. Cuanto tempo gobierno ta tuma pa evalua y otorga y dicon cierto hende/compania ta haya tereno y of optie riba tereno hopi lihe (lunanan, hasta simannan) y otro mester warda hopi tempo (añanan).
Minister Benny Sevinger di Infrastructura y DIP ta informa Bon Dia Aruba bon cla cu tin un solo maneho pa entrega e peticion: e mester bay DIP. Pero hopi biaha hende cu no kier warda ta manda carta pa minister pidiendo pa e proceso bay mas lihe.

“Nos ta evalua e carta ey anto ta depende kico e ta pidi, nos ta duna nos opinion na DIP riba e peticion di e ciudadano ey,” e minister ta bisa. Pasobra e mester trata esaki, e ta splica. E mester pone algo manera ‘medewerking of akkoord, of geen akkoord’. Despues e carta ta bay bek pa DIP.
Acelera e proceso di haya tereno
Nos a puntra minister si manda carta pa minister ta yuda realmente acelera e proceso di haya tereno? “Un ciudadano ta dicidi kico e ta haci: si mi (e ciudadano, red.) no kier warda pa mi tereno despues di mi peticion anto kier manda carta pa minister, e ta nan decision pa haci esey. Ami ta evalua e decision anto si mi tin cu pidi cooperacion (di DIP) mi ta hacie anto e carta ta bay bek na e dienst (DIP, red.) pa sigui trat’e. Ta nan derecho pa manda un carta no solamente pa minister pero tambe pa otro instancianan of directornan direct cu ta kere lo por yuda.”
E ta agrega: “E echo ta cu bo tin un peticion, bo ta riba e lista anto ora bo beurt ta yega, bo ta haya bo tereno si ta disponibel.” E minister ta enfatisa cu hende por haya tereno mas lihe depende e peticion.
E ta duna e siguiente ehempel: si un hende tin un huurgrond y e kier saca un pida pa su yiu y su yiu ta manda un carta pa acelera e proceso, esaki ta diferente cu un otro hende riba lista di warda pa haya un tereno. “Depende con e caso ta bini dilanti. Bo por tin tambe un persona cu no a haya tereno despues di haci su peticion 15 aña pasa anto un otro cu ta haya tereno despues di haci su peticion un luna pasa. Esaki ta pasobra abo a pidi un tereno na Oranjestad 15 aña pasa cu no tin, dus bo ta djis keda riba e lista ta warda. E otro kisas a pidi tereno un luna pasa na Sabana Basora por ehempel cu si tin, y cu ningun hende kier.”
Si e peticionnan ta similar, entrega na mesun caminda mesun momento, e ora esun cu a entrega e peticion prome, ta haya e tereno, e minister ta splica.

Evaluacion di minister na DIP
Den un combersacion cu e miembro di management di DIP, Isabel Dammers, un tempo pasa ya Bon Dia Aruba a haya informacion cu e departamento aki ta trata casonan cu a bay minister y cu su evaluacion mas lihe cu otronan. Nan ta pone nan ariba e stapel pa tratamento. Pa motibo di esey nos ta conclui cu ta bale pena pa ciudadanonan cu kier un contesta mas lihe riba nan peticion pa tereno, pa manda un carta pa minister di Infrastructura.
Tereno comercial & speculacion
Pa terenonan di gobierno destina pa desaroyo comercial, tin un otro procedura. E peticionnan tambe mester bay DIP pero esaki nan ta evalua otro. Segun minister Sevinger nan ta wak si e proyecto y plan di negoshi ta ‘fit’ den e vision di gobierno. “Si bo a entrega un plan di negoshi y proyecto pero esaki no ta pas den vision di gobierno aunke b’a entreg’e 10 aña pasa, bo no ta haya e tereno. Pasobra e no ta fit den nos linea di maneho. Y un otro cu si a entrega un carta algun dia prome y e idea ta fit den nos vision, e ta hay’e.”
Nos a puntra tambe con nan ta preveni cu compania ta specula cu optie riba tereno cu nan a haya. Pues cu un compania ta bende esaki entre socionan por ehempel, dealnan interno di un compania. “Nos no ta bay tras di e structura di un compania, con e ta hinca den otro. Speculacion semper ta bay keda. Compania ta haya tereno pero con ta deal cu socio, nos no ta toca cu e parti ey”, minister ta bisa. Nan ta controla solamente si e compania mes ta cumpli cu e reglanan, parti financiero, etc.