Proceso pa nombra un informador y kico su trabou ta encera

Diaranson ultimo Gobernador di Aruba su Excelencia Alfonso Boekhoudt, a nombra Sra. Tisa LaSorte como informador pa e proceso inicial di formacion di un gabinete di gobierno nobo. Esaki ta bira e di dos biaha cu LaSorte ta asumi e rol aki.

Proceso pa nombra un informador ta uno bastante simpel, pero cu toch tin aspectonan cu ta hopi importante pa tene na cuenta na momento di tuma un decision.

E informador tin varios responsabilidad cu ta cay den su man, manera por ehempel investiga cual opcionnan tin pa forma un gabinete cu tin e confiansa di un mayoria den Parlamento, cu ta enfoca riba hiba un politica financiero-economico sano y cu ta pone atencion na e gastonan di costo di bida na Aruba. E informador tin e tarea tambe pa entrega un rapport por escrito na Gobernador tocante e resultado di e tarea no mas tarda cu dia 20 di december 2024.

Despues cu resultadonan preliminar di eleccion a bira conoci, e lidernan di e partidonan politico cu a logra haya asiento den Parlamento di Aruba, a ser yama pa sinta cu Gobernador di Aruba pa cuminsa cu e rondanan di consulta. E rondanan di consulta aki ta e inicio di un proceso, cu den mayoria caso, ta tuma su tempo, pa yega na formacion di un gabinete di gobierno nobo.

Informacion cu ser comparti y discuti durante e consultanan aki ta keda confidencial, pero ta conocemento general cu topiconan cu ta ser discuti ta entre otro e resultado di eleccion, programanan di partido, propuestanan di e partido, kico ta e vision di e partidonan, entre otro, y tambe por haci nominacion di personanan pa asumi rolnan importante, manera ta esun di informador.

Gobernador di Aruba ta tuma den consideracion e informacion, y nominacionnan, cu e lidernan di e partidonan politico cu a haya un of mas asiento den parlamento ta haci, y basa riba tur esaki ta nombra e informador y despues na su turno un formador di gobierno.

Ta importante cu e persona cu e partido nomina pa e rol aki ta un persona, cu aunke ta di confiansa di e partido, ta uno cu ta imparcial te na cierto grado y ta un persona independiente den relacion cu e partidonan cu a logra haya un asiento den e Parlamento nobo.

Den su declaracion na prensa despues di su consulta cu Gobernador di Aruba Wendrick Cicilia a menciona cu partido AVP a nomina Sr. Rene Herde pa bira informador. Manera ya ta conoci esaki no ta e caso, pero tin pregunta tocante pakico Cicilia a comparti e informacion aki.

Informacion cu ta ser comparti durante e consultanan cu Gobernador ta confidencial y aunke no por bisa cu seguridad cu esaki ta e caso, e pregunta cu ta keda si pa motibo cu Cicilia a comparti e nomber di e persona, Rene Herde, cu nan a nomina pa informador, Sr. Herde no a ser nombra pa asumi e rol aki.

Algun ciudadano tambe a cuestiona si e nombramento di LaSorte como informador pa un di dos biaha no ta un poco na fabor di cierto partido. Prome biaha cu LaSorte a ser nombra informador tabata na 2021, hunto cu Eddy Werleman, despues di eleccion cu partido MEP a gana y cu a cera coalicion di gobierno cu partido RAIZ.

Den un periodo di mas o menos un siman LaSorte mester reuni cu e partidonan politico cu tin representacion di e parlamento nobo cu a keda eligi pa mira den cual direccion mester bay pa loke ta e formacion di e gobierno nobo. Si acaso cu por forma un gabinete asina, e informador mester convence e partidonan politico envolvi pa firma un declaracion di boluntad. Den e documento aki, e partidonan ta declara cu nan ta dispuesto pa forma un gobierno di coalicion hunto.

Den un caso cu no por logra e boluntad of compromiso di e partidonan yama pa forma un gobierno nobo, e parlamento lo tin cu dicidi si e gobierno actual ta keda demisionario, te ora cu un gobierno ta wordo forma. Tambe nan mayoria por dicidi di apunta otro persona pa temporalmente goberna e pais, mientras cu nan ta sigui e proceso di formacion.

Despues cu e informador finalisa su tareanan y ta exitoso den e negociacionnan cu e partidonan, e informador por recomenda un formador di gobierno. E formador tin e encargo pa forma un gabinete stabiel cu tin confiansa di e fraccionnan di e partidonan cu firma e declaracion di boluntad y cu ta consisti di personanan cu ta dispuesto y capaz pa yega na un maneho conhuntamente, enfoca riba hiba un politica financiero-economico sano y cu ta pone atencion na e gastonan di costo di bida na Aruba.

Parti di e encargo di formacion ta e composicion di un acuerdo di gobernacion general y un reparticion di cartera dentro di e gabinete nobo. Finalmente mester controla adelanta e capacidad di e candidatonan pa e funcion di minister y di minister plenipotenciario a base di e proceduranan cu ta referi na dje den e decreto nacional di 9 di september 2013.

Ta casi custumber cu e formador di gobierno ta e persona cu lo asumi e rol di prome minister den gobernacion. Esaki tabata e caso despues di eleccion di 2017 y 2021 na unda Gobernador di Aruba a nombra Evelyn Wever-Croes como formador di gobierno.

Te ainda no tin claridad tocante con e coalicion di e gobierno nobo lo mustra, tin indicacion cu lo por mira un coalicion entre partido Futuro y AVP. Aunke lider di partido Futuro a subraya cu primeramente mester alinea e programanan di partido pa wak nan compatibilidad prome cu determina e siguiente paso den e proceso, pero a agrega cu e partidonan grandi ta cambiando di postura, locual el a señala ta haci’e dificil pa partido Futuro formula un pensamento fiho tocante e partidonan aki.