Gobierno awor lo cuminza scapa placa y wardanan di polis ademas di e garage di polis na Balashi por fin lo ta miho organisa. Asina Minister di Husticia Sr. Rocco Tjon a bisa na un luga cu te ainda ta mustra manera un dump di auto bieu, como 200, pero cu pronto mester bira uno cu ta brinda un miho bista y seguridad.

E garage di polis na Balashi tabata practicamente un santana di auto, un mas bieu cu otro y otro cu hasta ta mustra den relativamente bon condicion. Ta autonan cu polis a confisca pa diferente motibo, sea cu e chauffeur tabata bebi of e auto no tabata cumpli cu tur rekisito. Problema ta cu aunke cu e doñonan di auto tabatin oportunidad pa busca nan, hopi a laga nan na sitio. Ademas tin autonan tambe cu tin beslag riba nan y e cantidad di bira grandi. Y no solamente tin e autonan aki na Balashi, sino na varios warda di polis rond Aruba. Den otro palabra, Cuerpo Policial ta e instancia cu tabata keda pega cu e autonan.

E vehiculonan na Balashi y na e wardanan di polis rond Aruba ta suma na un balor material cuantioso. Ta hopi placa tin wanta cu tur e vehiculonan cu a pasa nan dianan den man di polis, y cu e propietarionan no a bin busca.

Autonan ta bay warda di polis pa dos motibo. Sea nan ta a keda in ‘bewaring,’ of pa motibo cu a pone ‘beslag’ riba nan. Na e momentonan aki ley ta ilustra cua ta e vehiculonan cu mester keda den bewaring, cua ta bao beslag, con largo por tene nan y kico por haci cu nan y cuanto tempo e doño tin pa busca su propiedad.

“For di 2011 a pone algun proceso riba papel y di e tempo ey tabata haci e tipo di limpiesa aki. Pero awor nos a structur’e y tin un grupo di trabao cu ta consisti di hurista, Ministerio Publico – un partner hopi importante- pero tambe esnan den sector priva,” Rocco Tjon a bisa, agregando cu e procesonan mester ta bon alinea pa no confronta problemanan huridico, cu por trece daño pa Pais Aruba.

“Algun siman pasa nos a keda confronta cu ladronicia aki den, y p’esey nos kier cu e limpiesanan aki (di auto bieu) tuma luga na forma structura y evita cu garage di polis y otro warda di polis haya nan mes atrobe den un situacion asina,” e Minister y ex ehecutivo policial a bisa, referiendo na e ladronicianan. “E ta afecta e seguridad di e personal.”

Ministerio Publico a autorisa cu autonan cu tin hopi tempo den e garage y basa riba ley por keda destrui, of por bay pa un destaho publico. Pa e ultimo, ainda mester pasa e ley necesario.

“P’esey nos tin aki expertonan di daño for di sector priva cu por yuda identifica cua vehiculo lo por bay un destaho, sin cu ta destruy’e. Y nos a yega na un palabracion stricto cu Daltra. Tur e autonan (cu por keda destrui) ta bay Daltra, y di e forma aki Aruba ta haya su ‘fair share.” E fondonan lo bolbe pa reusa pa e wardanan di polis. Esaki ta e forma di traha awor, pa evita cu e situacion no ripiti.

Rocco Tjon a splica cu te cu awor, Cuerpo Policial tabata busca servicio di un compania di takel auto, paga e compania pa hiba e autonan, sea na Daltra of otro pa bende. Den otro palabra, e compania di takel tabata gana dos banda y Gobierno tabata core cu e gasto. Consecuentemente a busca otro forma pa traha directamente cu Daltra. A cera un convenio directamente cu Daltra cu ta busca y cumpra e material di pais Aruba y e fondonan ta bolbe pa Pais Aruba. “Nos ta papiando aki di algun cien mil florin cu Pais Aruba tabata perde y awor ta drenta den caha publico.”

E autonan tampoco ta bay pa dump. Segun e modelo di negoshi di Daltra, nan ta destrui e autonan y ta exporta e hero y otro material pa exterior. Pa motibo di e convenio aki tambe mester tin e proceso bon regula y controla, pasobra na momento cu e termino di un auto den beslag of bewaring pasa, Daltra tin e obligacion pa bin busca e vehiculo, pa asina evita cu un biaha mas ta acumula auto na cantidad na Balashi. “Nos no por bolbe na e situacion unda ta warda ora cu tin hopi auto y e ora ta acerca compania priva y ta pag’e pa saca e autonan. Awor aki tine bon regla, bon structura, unda ta evita e situacion (di seronan di auto.)” Minister Tjon a haya importante tambe pa agrega cu di e forma aki tambe ta yuda e personal di Cuerpo Policial den nan propio seguridad, pero tambe seguridad riba caya. “Hopi biaha un polis, pa motibo legitimo no ta saca un vehiculo for di caminda, pasobra no tin luga pa staciona. Y Pais Aruba ta keda responsabel tambe pa e seguridad di e vehiculo si no por pon’e den un espacio cu ta brinda e seguridad adecuado.”

Na e momentonan aki e ley ta permiti Gobierno pa pone beslag riba vehiculonan, pero ta permiti unicamente cu por destrui e propiedad den caso cu e doño no cumpli cu su obligacion. E intencion ta pa cambia e ley cu awor ta funciona a base di un decreto y e ta bira un decreto nacional cu stipulacion general (lbham), unda Parlamento tambe tin su papel pa hunga. Consecuentemente, e lbham lo regla e proceso cu ya no ta depende pensamento di un Minister, sino cu e ta un proceso basa riba ley y no un decreto ministerial. Cu esaki ta habri pues e posibilidad pa pone autonan riba destaho publico.

Awor cu Daltra ta paga Cuerpo Policial di Aruba un suma pa e vehiculonan, lo usa e fondonan pa pone luz adicional na Balashi, pa percura cu e area ta keda sigur, pa proteccion di e vehiculonan mes y e personal.

Den e caso specifico, tur e vehiculo cu awor ta den man di Daltra a pasa e periodo stipula pa ley, pero Minister Tjon ta reconoce cu mester ta sigur y cu pa sigura cu e proceso ta cana corecto y lihe, tur auto lo keda digitalmente registra. “Tin un administracion cu ta duna bista awor cua vehiculo ta den bewaring y cua tin embargo riba nan. Pero importante ta cu a tene cuenta cu e periodo cu ta hancra den ley. Pero p’esey mes nos ta contento cu a haya cooperacion di Ministerio Publico den e caso aki y e fiscal encarga cu asuntonan di trafico.”

E Minister a bisa di ta hopi gradicido na e grupo di trabao consistiendo representante di diferente organisacion publico y priva cu a permiti cu por a inicia un sistema nobo pa maneha e parke di autonan confisca. E ta nifica tambe cu propietarionan di autonan cu polis a tuma den posicion pa ‘bewaring’ of ‘beslag’ awor mester actua mas lihe pa recupera nan propiedad. E cantidad maximo cu un auto por keda den garage bao responsabilidad di Cuerpo Policial di Aruba ta 90 dia y unabes cu e dianan pasa, Daltra tin e oportunidad pa cumpra e vehiculo.